«Арсенал» бош мураббийи Микел Артета «Манчестер Сити»га қарши бўлиб ўтадиган Англия Суперкубоги баҳси олдидан ҳамкасби Хосеп Гвардиола ҳақида илиқ фикрлар билдирди.
«Гвардиоланинг қилган ишлари учун унга бўлган миннатдорлигимни тўлиқ ифодалай олмайман. Аввало, у Премер-лига ва бутун мамлакатда футболни тушунишнинг янги йўлини очиб берди. У ўйинни мутлақо бошқа даражага олиб чиқди ва стандартларни ҳеч қачон бўлмаган даражага кўтарди.
Гвардиола ажойиб ва ноёб мутахассис — футбол тарихидаги энг яхши мураббий. Ўйлашимча, Премер-лигада у етишмай қолади. Шахсан мен у билан бирга ўтказган вақтларим учун унга миннатдорчилик билдирмоқчиман», — дея Артетанинг сўзларидан келтиради Sky Sports нашри.
