«Миннесота Юнайтед» ҳужумчи Келвин Йебоа фаолиятини Англия Премер-Лигасида давом эттириши мумкин. Бу ҳақда журналист Экрем Конур ижтимоий тармоқларда хабар берди.
Манбага кўра, ганалик 26 ёшли футболчи «Эвертон», «Ипсвич» ва «Кристал Пэлас» клублари қизиқиш доирасида. Йебоанинг «Миннесота» билан амалдаги шартномаси келаси йилнинг охирига қадар мўлжалланган.
Ҳужумчи МЛСнинг бу мавсумида 33 та учрашувда майдонга тушиб, 18 та гол урди ва тўртта голли узатмани амалга оширди.
Келвиннинг Европада ўйнаш тажрибаси ҳам бор. У фаолияти давомида «Женоа», «Аугсбург», «Стандард», «Монпеле» ва яна бир нечта клуб шарафини ҳимоя қилган.
Шунингдек, Йебоа «Вест Ҳэм» клубининг футбол академиясида таҳсил олган. Аммо бирорта АПЛ жамоасида ўйнамаган.
