«Сурхон» клуби сафарда Суперлигани муддатидан олдин тарк этган «Машъал»га қарши ўйнади ва унда ҳисоб очилмади – 0:0.
Беллашувдан кейин «Сурхон» бош мураббийи Анвар Ғофуров матбуот анжуманида қатнашди.
— Ассалому алайкум! Бу ерда ҳеч бир жамоа осонликча очко қўлга киритмаган. Буни олдиндан билардим ва футболчиларга ҳам етказишга ҳаракат қилгандим. Чунки ҳар бир учрашувда, рақиб қайси жамоа бўлишидан қатъи назар, яхши шаклланган жамоага қарши ўйнаймиз. Маълум сабабларга кўра, кўпчилик бу ерда ғалаба қозониши мумкин, аммо ишонч билан айта оламанки, ҳеч кимга очко олиш осон бўлмаган.
«Машъал» — кўп йиллик тарихга, яхши шаклланган тизим ва кучли академияга эга жамоа. Шунинг учун ҳар бир рақибни ҳурмат қилиш керак. Ҳеч кимдан қўрқмаслик лозим, лекин рақибга ҳурмат билан қараш ва буни майдонда кўрсата олиш муҳим. Ҳар бир футболчи профессионал бўлиши, ҳар бир учрашувга тўғри тайёргарлик кўриши ва майдонга бор кучини бериш учун тушиши керак.
Афсуски, бугунги учрашувда вазиятлар бўлди, қизиқарли ўйин кечди. Аммо имкониятлардан унумли фойдалана олмасак, жуда қийин бўлади. Шунга қарамай, йигитларга ишонаман ва қайд этилган дуранг учун масъулиятни 100 фоиз ўз зиммамга оламан. Балки бу борада бошқача гапиришим керакдир, аммо умумий олганда, футболчилар яхши ҳаракат қилишди. Шу билан бирга, рақиб жамоани ҳам ҳурмат қилиш керак, чунки улар ҳам яхши футболчилардан таркиб топган.
Энди кейинги учрашувларга тайёргарлик кўриб, ўзимизга керакли натижаларни қайд этишга ҳаракат қиламиз. Ташриф буюрган мухлисларга ҳам раҳмат айтаман. Ўйлайманки, кейинги ўйинларда ғалабалар билан уларни хурсанд қилишга ҳаракат қиламиз.
— Анвар ака, бугунги дурангдан қониқдингизми? Ўйинда тактик хатоларга йўл қўйилдими ёки футболчиларнинг ўзида нимадир етишмадими? Ғалабага бўлган иштиёқ камлик қилдими?
— Ўйлайманки, ҳар биримизнинг ўз хатомиз бор. Бундай ўйинларда ким ҳақиқий профессионал эканини ва ким охиригача профессионалликни намоён эта олмаслигини натижа кўрсатади. Ҳар бир футболчи майдонга чиқиб, ўз вазифасини бажариши керак. Унинг қиладиган иши шу, бундан ортиғи эмас. Ахир футболчилар бир неча йилдан буён футбол билан шуғулланиб келади, ёшлигидан шу касбни танлаган. Шунинг учун ҳар бири ўз ишини бажариши шарт.
Бу — футбол. Очиғини айтсам, масъулиятнинг 80–90 фоизи менинг зиммамда. Албатта, ғалаба қозонишни истагандик ва турнир жадвалида юқорироқ ўринни эгаллашга ҳаракат қилишимиз керак эди. Аммо барибир ҳеч кимга осон эмас.
— Жамоада маошлар кечиккани, футболчиларга ойлик пуллари ҳали тўлиқ берилмагани ҳақида хабарлар бор. Бу ҳолат ўйин сифатига қанчалик таъсир кўрсатмоқда? Умуман, ушбу муаммо ҳал этилдими?
— Албатта, бу ўз таъсирини кўрсатади. Ҳар бир футболчининг ўз оиласи, орзу-умидлари бор. Нима бўлишидан қатъи назар, бундай вазиятда ўйнаш жуда қийин. Узоқ вақт давомида футболчиларнинг руҳиятини кўтариб туриш ҳам осон эмас. Маошлар билан боғлиқ масалалар бироз ҳал этилса, ишлаш ҳам енгиллашади.
Лекин бу бизнинг ишимиз эмас. Барибир ўз вазифамизни бажаришимиз керак. Келажагимиз ва ўзимиз учун ишлашимиз лозим. Ҳар бир футболчининг орзу-умидлари бор: кучлироқ жамоада ўйнаш, балки хориж клубига трансфер бўлиш. Аммо буларнинг ҳеч бири ўз-ўзидан амалга ошмайди. Ҳар бир учрашувда ўзингни исботлашинг, савиянгни кўрсатишинг керак. Фақат ўз ҳаракатларинг билан мақсадингга эришишинг мумкин.
— Мавсум давомида Даврон Мергановнинг бошқа жамоага ўтиши ҳақида турли фикрлар билдирилмоқда. Бу борада сизда қандай маълумот бор?
— Ҳозир миш-мишлар ҳам, гап-сўзлар ҳам кўп. Нима бўлишидан қатъи назар, очиғини айтсам, айни пайтда бу масала мени қизиқтирмайди. Ҳозир ўз олдимизга қўйилган вазифалар бор ва шунинг устида ишлашимиз керак. Асосий мақсадимиз — турнир жадвалида юқорироқ ўринни эгаллаш ва мухлисларни хурсанд қилиш. Бу аниқ.
Қолган миш-мишларга келсак, Мессисиз ҳам «Барселона», Роналдусиз ҳам «Реал» бор. Шунинг учун ким кетади, ким келади — бу ҳозир муҳим эмас. Агар футболчиларимиздан бири яхши, кучли жамоага ўтса, албатта, унинг номидан хурсанд бўламан.
— Беҳруз Шайдуловнинг жароҳати қанчалик жиддий?
— Ҳозирча бирор нарса дейиш қийин. Аммо рақиб футболчиси бу ҳаракатни атайлаб қилмади. Унинг оёғи сирпаниб кетди ва бутун гавдаси билан Беҳрузнинг оёғи устига тушди. Жароҳат қанчалик жиддий эканини тиббий кўрикдан кейин аниқ айтиш мумкин», - дея Ғофуровнинг сўзларини келтиради Tribuna.uz мухбири.
