«Андижон» ва «Локомотив» (1:3) беллашувидан кейин меҳмонлар бош мураббийи Мирко Еличич матбуот анжуманида қатнашди.
— Албатта, қўлга киритилган уч очкодан жуда хурсандман. Андижонда ўйнаш ҳар доим қийин кечади. Бу ерга етиб келишнинг ўзи ҳам осон эмас. Бугунги ўйинда, айниқса, гол урганимиздан кейин вазиятни тўғри назорат қила олганимиз яхши бўлди. Рақиб жамоа ҳам бунинг учун таҳсинга лойиқ. Улар ҳақиқатан ҳам яхши ҳаракат қилишди.
- «Андижон» кўрсатган ўйин ҳақида нима дея оласиз?
- Менга «Андижон»нинг йил бошидан буён қандай таркиб шакллантиргани, футболчиларнинг ҳаракати ва ўйини ёқди. Балки уларга бироз омад етишмаётгандир, лекин футболда шундай мавсумлар ҳам бўлади. Шунга қарамай, жамоанинг ҳаракатлари ва ўйин услуби менда яхши таассурот қолдирди.
Бу учрашув олдидан бизга осон бўлмаслигини билардик ва шунга тайёргарлик кўргандик. Чиройли футбол бўлмаслигини, курашларга бой ўйин кечишини кутгандик. Майдон ҳолати ҳам юқори савиядаги футбол намойиш этишга имкон бермайди. Шундай бўлса-да, ўз ўйинимизга нимадир қўшишга ҳаракат қиламиз. Футболчиларимиз ўйинни ўқиш борасида ҳали кўпроқ ишлашлари керак. Жисмоний жиҳатдан эса улар яхши спортчилар. Биз бошқа жиҳатларга кўпроқ эътибор қаратяпмиз. Умуман олганда, бугунги каби учрашувда ғалаба қозониш ёқимли.
— Ивановнинг голига қандай баҳо берасиз?
— У бу ишнинг ҳақиқий мутахассиси. Бу йил бундай вазиятларда кўпроқ гол уриши керак эди, деб ўйлайман. Лекин унинг ёшидаги футболчи учун стандарт вазиятларни бажариш маҳорати жуда яхши. Буни кўриб турганимиздан хурсандмиз. Унинг техникаси юқори, машғулотларда ҳам бунинг устида кўп ишлайди. Бугун бу меҳнатининг самарасини кўрганидан хурсандман.
— Яхши ўйнаб, турган Билол Туплиевни нима учун алмаштирдингиз?
— Биз ҳар бир ўйинда ҳужум чизиғидаги футболчиларни алмаштириш ҳақида ўйлаймиз. Замонавий футболда ҳужумчилар энг кўп меҳнат қиладиган футболчилар ҳисобланади. Улар тўпсиз ҳолатда ҳам ҳимояда фаол ишлаши, доимо очилиши ва рақибга муаммо туғдириши керак. Шунинг учун улар кўп куч сарфлайди. Жамоани янгилаш, ўйинга янги куч қўшиш керак бўлган пайтда айнан шу позицияда ўзгариш қиламиз.
— Ўзбекистон кубоги яримфиналида ҳам «Андижон» жамоасига қарши майдонга тушасизлар. Ушбу учрашув олдидан қандай фикрдасиз?
— Бу кубок мусобақаси. Унда жамоанинг чемпионатдаги жорий ҳолати ёки формаси ҳал қилувчи аҳамиятга эга эмас. Кубокда битта ўйин ҳаммасини ҳал қилиши мумкин. Ўша куни ҳар қандай натижа қайд этилиши эҳтимолдан ҳоли эмас. Биз «Андижон»га етарлича ҳурмат билан қараймиз ва ушбу учрашувга максимал даражада жиддий тайёргарлик кўрамиз.
Менимча, ўйин ОКМК стадионида ўтказилади. У ерда ҳам яхши майдон бор. Лекин федерация бундай ўйинларни нима учун шундай майдонларда ўтказишга рухсат бераётгани тушунарсиз. Кубок яримфинали чиройли футбол намойиш этишга имкон берадиган майдонда ўтказилиши керак. Бу жиҳатдан бироз афсусдаман», - дея Еличичнинг сўзларини келтиради Tribuna.uz журналисти.
