Хулиан Алварес «Атлетико»ни тарк этиб, «Барселона»га ўтиши учун шартномани бир томонлама бекор қилиш ҳуқуқидан фойдаланиши мумкин. Мundo Deportivо хабарига кўра, клублар ўртасида тўғридан-тўғри келишувга эришиш деярли имконсиз.
Профессионал спортчилар меҳнат муносабатларини тартибга солувчи низомнинг 16-моддасига кўра, футболчи клуб айби бўлмаган ҳолатда шартномани ўз ташаббуси билан бекор қилса, клубга товон пули тўлаши керак. Агар унинг миқдори аввалдан белгиланмаган бўлса, суммани меҳнат суди спорт шароитлари, клубга етказилган зарар ва шартнома бекор қилинишининг сабабларини ҳисобга олган ҳолда белгилайди.
Агар Алварес шартнома бекор қилинганидан кейин бир йил ичида бошқа клуб билан келишув тузса, янги жамоа товон пулини тўлаш учун субсидиар жавобгарликка эга бўлади. Шу сабабли футболчи «Барселона»га ўтган тақдирда, ушбу харажат каталонияликлар зиммасига тушиши мумкин.
Маълумот учун, Алвареснинг «Атлетико» билан шартномаси 2030 йилгача амал қилади. Унинг шартномасидаги товон пули 490 млн еврони ташкил этади, бироқ суд айнан шу суммани белгилаши шарт эмас. 26 ёшли ҳужумчи йилига солиқларгача тахминан 12,5 млн евро, солиқлардан кейин эса 6,2 млн евро атрофида даромад олади.
Эслатиб ўтамиз, Алварес келажаги атрофидаги ноаниқликлар фонида «Атлетико»нинг кетма кет учинчи машғулотини ҳам ўтказиб юборган.
