«Ақлбовар қилмас воқеа» — Модрич Месси ва Роналду даврида «Олтин тўп»ни ютгани ҳақида

«Милан» клуби ва Хорватия миллий жамоаси яримҳимоячиси Лука Модрич 2018 йилда қўлга киритган «Олтин тўп»и ҳақида фикр билдирди.

— Ўша даврда сен «Олтин тўп»ни қўлга киритдинг. Роналду ва Месси даврида охирги марта 2007 йили «Милан»да Кака уни ютганди. 2008 йилдан 2017 йилга қадар мукофотни Криштиану ва Лео бўлишиб келишди, сен эса уларнинг ҳукмронлигига чек қўйдинг. Гарчи сен жамоавий футболчи бўлсанг-да, индивидуал эътироф ҳар бир футболчининг орзуси ва ҳеч ким бу совринни сендан тортиб ололмайди — сен унга лойиқ эдинг.

— Ҳа, бу ақлбовар қилмас даражадаги ютуқ — футболда мавжуд бўлган энг буюк индивидуал эътироф. Ундан муҳимроқ нарса йўқ. Айниқса, Криштиану Роналду ва Лионел Месси каби икки буюк феномен ҳукмронлик қилган даврда уни қўлга киритиш, ҳар йили Неймар ва Бензема каби бошқа ажойиб футболчилар билан рақобатлашиш осон эмасди. Кейинчалик Карим ҳам бу совринни қўлга киритди.

Уни ютиш — мен учун ақлбовар қилмас воқеа бўлган. «Олтин тўп» соҳиблари рўйхатига қарар эканман, ушбу совринга эга бўлганимдан жуда хурсандман ва фахрланаман.

Бундан ташқари, биз кичик давлатдан эканлигимиз сабабли уни қўлга киритиш Испания, Италия, Германия ёки Франция каби йирик давлатлар футболчиларига қараганда анча қийин. Биз икки баробар кўпроқ меҳнат қилишимизга тўғри келади. Шунинг учун бу соврин билан янада кўпроқ фахрланаман. Аммо доим айтаман: энг муҳими — жамоа. Бу ҳеч қачон ўзгармайди.

Бу «Реал»да, энг муҳими, Хорватия миллий жамоасида ажойиб мавсум ўтказганимнинг ёқимли эътирофи бўлганди. Бундан жуда хурсандман, — дейди Модрич AS нашри билан интервюда.