«Айнтрахт» клуби бош мураббий Алберт Риера билан шартнома томонлар ўзаро келишувига кўра бекор қилинганини эълон қилди.
Испаниялик мутахассис билан бирга унинг ёрдамчилари — Пабло Ремон Артета ва Лоренцо Долчетти ҳам жамоани тарк этмоқда.
Маълумот учун, Риера январ ойида «Айнтрахт»ни бошқаришни ўз зиммасига олган эди. Унинг қўл остида жамоа 4 та ғалаба, 5 дуранг ва 5 та мағлубиятни қабул қилиб олди. «Айнтрахт» Бундеслигада мавсумни 8-ўринда якунлади.
«Клуб ва мен ҳамкорликни тўхтатиш бўйича биргаликда қарор қабул қилдик. Бош мураббий сифатида спорт натижалари учун масъулиятни ўз зиммамга оламан. Бу давр мобайнида менинг ягона вазифам жамоа ўйинини яхшилаш ва муваффақиятга эришиш эди.
Ўзимни клуб ва футболчиларни ҳимоя қилишга бурчли деб билдим ва бундай вазиятда яна шундай йўл тутган бўлардим. Жамоанинг майдондаги натижага максимал даражада эътибор қаратиши муҳим эди. Шахсий манфаатлар мен учун ҳеч қачон устувор бўлмаган. Менинг мақсадим доимо бир хил — футболчиларни ривожлантириш ва муваффақиятга эришиш. «Айнтрахт» тарихининг бир қисми бўлиш имконияти учун тақдирдан миннатдорман», — деди Риера.
