Ҳалк «Флуминенсе» билан шартнома имзолади. Бу ҳақда клуб матбуот хизмати хабар берди.
Маълум қилинишича, 39 ёшли футболчи билан битим 2027 йил 31 декабргача мўлжалланган. У жамоага эркин агент сифатида келиб қўшилган.
«Ҳақиқатан ҳам бразилиялик буюк футболчилардан бири клубимиз билан 2027 йил 31 декабргача шартнома имзолади. Ҳалк фаолияти давомида ўйнаган ҳар бир жамоасида совринлар ютган», — дейилади «Флуминенсе» баёнотида.
Аввалроқ «Атлетико Минейро» 1 май куни Халк билан шартномани ўзаро келишув асосида бекор қилганини эълон қилганди.
Маълумот учун, ҳужумчи 2021 йилдан буён «Атлетико Минейро» сафида тўп тепиб, клуб билан Бразилия чемпиони бўлган ҳамда тўрт бор штат чемпионлигини қўлга киритган. У барча мусобақаларда 309 та баҳсда 140 та гол урган.
