«Inter Mayami» hujumchisi Lionel Messi MLS muntazam chempionatining «Sinsinnati»ga qarshi bahsida samarali harakatlari bilan ajralib turmadi. 2:2 hisobida yakunlangan bellashuvda argentinalik futbolchi gol urish yoki golli uzatmani amalga oshira olmadi.
39 yoshli Messi maydonda to‘liq harakat qildi va 44-daqiqada sariq kartochka oldi. U raqib darvozasi tomon beshta zarba yo‘lladi, biroq ularning hech biri darvoza sohasiga aniq bormadi: ikkita zarba darvoza tashqarisidan ketdi, yana uchtasi himoyachilar tomonidan to‘sildi.
Shu tariqa, argentinalik yulduz MLSda ketma-ket ikkinchi bahsda gol yoki assist qayd etmadi. Bungacha u «Nyu-York Red Bullz»ga qarshi o‘yinda ham samarali harakat qila olmagan. O‘sha bahsda «Inter Mayami» 0:2 hisobida mag‘lub bo‘lgan, Messi esa ikkinchi bo‘limda zaxiradan maydonga tushgan edi.
Ma’lumot uchun, Messi ushbu mavsumda MLS doirasidagi 29 ta bahsda 25 ta gol urib, 12 ta golli uzatmani amalga oshirgan.
