ЖЧ-2026да ишлаш учун АҚШга киритилмаган Умар Артан Европа суперкубоги ўйинига тайинланди

ЖЧ-2026да ишлаш учун АҚШга киришга рухсат ололмаган Умар Абдулқодир Артан Европа суперкубогини бошқарадиган бўлди.

2025 йилда Африканинг энг яхши ҳаками деб топилган 34 ёшли Артанга аввалроқ АҚШга киритилмаганди. Оқ уй ишчи гуруҳи ва ЖЧ-2026 ташкилий қўмитаси раҳбари Эндрю Жулиани бу қарорга сомалилик ҳакамнинг террорчилик ташкилотлари аъзолари деб гумон қилинган шахслар билан эҳтимолий алоқалари ҳақидаги шубҳалар сабаб бўлганини маълум қилган.

11 июн куни UEFA Умарни «ПСЖ» ҳамда «Астон Вилла» ўртасидаги Европа суперкубоги баҳсига бош ҳакам этиб тайинлаганини эълон қилди. Беллашув 12 август куни Залцбург шаҳрида бўлиб ўтиши режалаштирилган.

Таъкидланишича, ушбу қарор UEFA ва Африка футбол конфедерацияси ўртасида имзоланган меморандум доирасида қабул қилинган бўлиб, у турли соҳаларда, жумладан ҳакамлик йўналишида ҳамкорликни рағбатлантиришга қаратилган.