Жаба Жигаури: «Жамшид Саидов кучли мотиватор»

«Қизилқум» клубининг етакчиларидан бири, жамоа сардори – грузиялик Жамбули Жигаури юртимизда фаолият олиб бораётганидан бери мухлисларнинг эътирофига сазовор бўлиб келмоқда.

Бу йил «Қизилқум» учун ўйнаб келаётган ҳужумкор ярим ҳимоячи ўз жамоасида ҳам алоҳида статусга эга. У жамоасининг таъбир жоиз бўлса, «юрагига» айланган.

Футболчи Tribuna.uz мухбирининг бир қатор саволларига жавоб қайтарди.

- Жамоа етакчиси ва «капитани» сифатида сиздан кўп нарса кутилишини доимо ҳис қилиб турасиз. Бу сизга қўшимча куч берадими ёки аксинча, зиммангизга қўшимча босим юклайдими?

- Аввало шуни айтиш керакки, босим — бу афзаллик. Агар одамлар мендан кўп нарса кутаётган бўлса, бунинг ўзи мени хурсанд қилади. Албатта, мендан кўп нарса талаб қилинганда, мотивациям янада ошади.

- Навоийда ҳам футбол мухлислари кўп. Аммо тан олиш керакки, улар, масалан, Фарғона водийси клублари мухлисларидек фаол эмас. Трибуналарда бундай кучли босим бўлмаган муҳитда ўйнаш сизга қулайми?

- Навоийда ҳам мухлислар стадионга янада фаолроқ ташриф буюришларини истардим. Масалан, Фарғона ёки Андижонда бўлгани каби. Албатта, стадионда мухлислар кўп бўлиши жамоа учун яхшироқ.

- Жамшид Саидов бош мураббий бўлганидан кейин «Қизилқум»да нималар ўзгарди?

- Жамшид Саидов у ёки бу ўйинга жамоани жуда яхши тайёрлай олади, у кучли мотиватор. Шунингдек, у ўйин услубимизни ҳам ўзгартирди. Бу эса бизга ҳужумда янада кўпроқ имкониятлардан фойдаланиш имконини берди.

- Айни пайтда Ўзбекистон чемпионатида бир нечта грузиялик легионерлар тўп тепмоқда. Сизнингча, улар орасида энг кучлиси ким?

- Умуман олганда, грузиялик легионерлар Ўзбекистон чемпионатида ўзларини яхши намоён қилишмоқда.

- Сизнингча, Ўзбекистон ва Грузия чемпионатларининг асосий фарқи нимада?

- Чемпионатлар ўртасидаги асосий фарқ, эҳтимол, ўйин суръати ва жисмоний тайёргарликда бўлса керак.

- Ўзбекистон чемпионатида тўп тепаётган грузиялик легионерлардан қайси бири билан кўпроқ мулоқот қиласиз?

- Ўзбекистон чемпионатида тўп тепаётган барча грузиялик футболчилар билан алоқадаман. Жумладан, Ашортиа ва Гвазава билан ҳам мулоқот қилиб тураман.

- «Қизилқум»да энг ҳазилкаш ва энг жиддий футболчи ким?

- «Қизилқум»да энг ҳазилкаш футболчи — Роман Папарига, энг жиддийси эса — Григол Чабрадзе (кулади).

- ФИФА кунлари сабабли терма жамоалар ўйинлари муносабати билан юзага келган ушбу танаффус «Қизилқум» учун қай даражада зарур эди?

- Менимча, уч ҳафта давом этадиган танаффус ҳеч бир жамоа учун фойдали эмас. Ҳозир барча жамоалар бир хил шароитда ва бу даврдан ҳар бир жамоа қай даражада унумли фойдаланиши жуда катта аҳамиятга эга. Бу ҳал қилувчи аҳамият касб этади.