Jaba Jigauri: «Jamshid Saidov kuchli motivator»

«Qizilqum» klubining yetakchilaridan biri, jamoa sardori – gruziyalik Jambuli Jigauri yurtimizda faoliyat olib borayotganidan beri muxlislarning e’tirofiga sazovor bo‘lib kelmoqda.

Bu yil «Qizilqum» uchun o‘ynab kelayotgan hujumkor yarim himoyachi o‘z jamoasida ham alohida statusga ega. U jamoasining ta’bir joiz bo‘lsa, «yuragiga» aylangan.

Futbolchi Tribuna.uz muxbirining bir qator savollariga javob qaytardi.

- Jamoa yetakchisi va «kapitani» sifatida sizdan ko‘p narsa kutilishini doimo his qilib turasiz. Bu sizga qo‘shimcha kuch beradimi yoki aksincha, zimmangizga qo‘shimcha bosim yuklaydimi?

- Avvalo shuni aytish kerakki, bosim — bu afzallik. Agar odamlar mendan ko‘p narsa kutayotgan bo‘lsa, buning o‘zi meni xursand qiladi. Albatta, mendan ko‘p narsa talab qilinganda, motivatsiyam yanada oshadi.

- Navoiyda ham futbol muxlislari ko‘p. Ammo tan olish kerakki, ular, masalan, Farg‘ona vodiysi klublari muxlislaridek faol emas. Tribunებში bunday kuchli bosim bo‘lmagan muhitda o‘ynash sizga qulaymi?

- Navoiyda ham muxlislar stadionga yanada faolroq tashrif buyurishlarini istardim. Masalan, Farg‘ona yoki Andijonda bo‘lgani kabi. Albatta, stadionda muxlislar ko‘p bo‘lishi jamoa uchun yaxshiroq.

- Jamshid Saidov bosh murabbiy bo‘lganidan keyin «Qizilqum»da nimalar o‘zgardi?

- Jamshid Saidov u yoki bu o‘yinga jamoani juda yaxshi tayyorlay oladi, u kuchli motivator. Shuningdek, u o‘yin uslubimizni ham o‘zgartirdi. Bu esa bizga hujumda yanada ko‘proq imkoniyatlardan foydalanish imkonini berdi.

- Ayni paytda O‘zbekiston chempionatida bir nechta gruziyalik legionerlar to‘p tepmoqda. Sizningcha, ular orasida eng kuchlisi kim?

- Umuman olganda, gruziyalik legionerlar O‘zbekiston chempionatida o‘zlarini yaxshi namoyon qilishmoqda.

- Sizningcha, O‘zbekiston va Gruziya chempionatlarining asosiy farqi nimada?

- Chempionatlar o‘rtasidagi asosiy farq, ehtimol, o‘yin sur’ati va jismoniy tayyorgarlikda bo‘lsa kerak.

- O‘zbekiston chempionatida to‘p tepayotgan gruziyalik legionerlardan qaysi biri bilan ko‘proq muloqot qilasiz?

- O‘zbekiston chempionatida to‘p tepayotgan barcha gruziyalik futbolchilar bilan aloqadaman. Jumladan, Ashortia va Gvazava bilan ham muloqot qilib turaman.

- «Qizilqum»da eng hazilkash va eng jiddiy futbolchi kim?

- «Qizilqum»da eng hazilkash futbolchi — Roman Papariga, eng jiddiysi esa — Grigol Chabradze (kuladi).

- FIFA kunlari sababli terma jamoalar o‘yinlari munosabati bilan yuzaga kelgan ushbu tanaffus «Qizilqum» uchun qay darajada zarur edi?

- Menimcha, uch hafta davom etadigan tanaffus hech bir jamoa uchun foydali emas. Hozir barcha jamoalar bir xil sharoitda va bu davrdan har bir jamoa qay darajada unumli foydalanishi juda katta ahamiyatga ega. Bu hal qiluvchi ahamiyat kasb etadi.