«Барселона» раҳбарияти жамоанинг марказий ҳимоячиси Жерар Мартинга янги меҳнат шартномасини таклиф қилишни режалаштирмоқда. Бу ҳақда Barça Universal хабар берди.
Футболчининг клуб билан амалдаги битими 2028 йилнинг ёзига қадар мўлжалланган. Клуб эса ушбу келишув муддатини янада узайтиради.
Эслатиб ўтамиз, испаниялик 24 ёшли футболчи 2023 йилда «Барселона»га қўшилган. Клуб унинг трансфери учун атиги 100 минг евро тўлаган. Бироқ кейинчалик «кўк-анорранглилар» бош мураббийи Ҳанси Флик Мартинни марказий ҳимоячига айлантирди.
Бу мавсумда Жерар Ла Лигада 6 та учрашувда майдонга тушиб, шуларнинг 5 тасида асосий таркибда ўйнади. Transfermarkt маълумотларига кўра, унинг бозор қиймати 25 миллион еврони ташкил этади.
Аввалроқ Каталония клуби вингери Рафиня кетма-кет иккинчи ой Ла Лигада энг яхши футболчи деб топилганди.
