«Вазиятни тубдан ўзгартиришимиз керак» — Клопп Германия бош мураббийи бўлишга яқинлигини тасдиқлади

Юрген Клопп Германия миллий жамоаси бош мураббийи лавозимини эгаллаши эҳтимоли ҳақида гапиради.

Аввалроқ Германия футбол иттифоқи (DFB) ЖЧ-2026да 1/16 финал босқичидаёқ мусобақани тарк этган жамоа бош мураббийи Юлиан Нагелсманн билан тузилган шартнома бекор қилинганини маълум қилганди. Шунингдек, DFB расман Клопп билан музокараларни бошлашини эълон қилди. Мутахассис эса бу лавозимни эгаллашга тайёр эканини билдирди.

«Ливерпул»нинг собиқ бош мураббийи ҳозирда Red Bull компаниясининг футбол йўналиши раҳбари сифатида фаолият юритмоқда.

Музокаралар ҳақида

«Ҳа, музокаралар бўлаётганини тасдиқлайман. Ҳаммаси жуда тез содир бўлди. Юлиан истеъфога чиқди. Германия футбол иттифоқи янги бош мураббий изламоқда ва улар мен билан музокара ўтказяпти».

Олдинда қилиниши керак бўлган ишлар ҳақида

«Бунинг учун вақт керак. Red Bull билан амалдаги шартномам бор. Музокараларга қизиқиш билдираётганимни айтганман. Улар жиддий ва мазмунли бўлади, чунки гап фақат Юлиан Нагелсманннинг ўрнини тўлдириш ҳақида эмас.

Шунингдек, иш берувчим Оливер Минцлафф билан ҳам суҳбатлашишим керак. Биз аллақачон айрим масалаларни муҳокама қилдик. Менимча, у бунга тўсқинлик қилмайди. Бу ерда 19 ойдан бери ишлаяпман ва бу давр жуда сермазмун ўтди».

Кайфияти ҳақида

«Тайёрман. Музокаралар бошланиши билан инсон янада тезроқ фикрлай бошлайди. Вазиятни тубдан ўзгартиришимиз керак», — деди Клопп MagentaTV телеканалига берган интервюсида.