UFC енгил вазн чемпиони Илия Топурия нега WBC версияси бўйича ярим ўрта вазндаги жаҳон чемпиони Райан Гарсия билан жанг қилиш унга қизиқ эмаслигини тушунтирди.
«Мен ҳозир чўққида турганлар билан жанг қиламан. Райан Гарсия… билмадим. У тан олинган чемпион эмас ва менинг даражамда эмас.
Райан менинг спортимда қилган ишларимни қилмаган. Мен ўзим каби катта ютуқларга эришган рақиб билан жанг қилишим керак», — деди Топурия Full Mount MMA аккаунтига берган интервюсида.
Маълумот ўрнида, Илия профессионал ММА фаолиятини 2015 йил апрел ойида бошлаган. UFC’да у 2020 йил октябр ойидан буён иштирок этиб келмоқда.
Топурия ҳисобида 17 ғалаба мавжуд бўлиб, шулардан фақат иккитаси ҳакамлар қарори билан қўлга киритилган, мағлубият эса йўқ. Аввалроқ Илия Царукяннинг мухлислари ва оиласи олдида унинг жағини синдиришини айтиб ўтганди.
