Шоҳруз Норхонов: «Пахтакор» «Нефтчи»га қарши ўйинда ғалаба учун борини беради»

22 – 26 октябр кунлари Суперлиганинг 25-тур ўйинлари ўтказилади. Барчанинг диққат-марказидаги ўйин шубҳасиз «Пахтакор» ва «Нефтчи» жамоалари ўртасида бўлиб ўтади. Бу чемпионлик учун курашда жуда муҳим роль ўйнайди.

Мухлислар яхши билган футболчи Шоҳруз Норхонов эса 25-турдаги жуфтликлар ҳақида қуйидагича муносабат билдирди.

22 октябр.
18:30. Бунёдкор – Машъал
- Бу ўйинда «Бунёдкор» фаворит. Шу боис улар ғалаба қозонади, деб ўйлайман. «Машъал» эса бор эътиборини ёшларни ўйнатишга ва келаси йилга таркибни ёшартиришга қаратишмоқда.

23 октябр.
19:00. Пахтакор – Нефтчи
- Бу турнинг марказий учрашуви. Кўпчиликнинг фикрича, бу йил ўйини ҳам бўлиши мумкин. «Нефтчи» Кубокдан чиқиб кетди. Битта совринни қўлга киритиш имконияти йўқолди. «Пахтакор» эса Кубокдан чиқиб кетган. Чемпионатда чемпионлик учун курашяпти. Менимча, ушбу тўқнашув ҳақиқатда йил ўйини бўлади. «Пахтакор» жиддий тайёргарлик ва жиддий «настрой» билан тушса минимал ҳисобда ғалаба қозонади. Лекин «Нефтчи» ҳам жиддий курашади. Улар охиригача қаршилик кўрсатади. Чунки фарғоналикларни дуранг ҳам қаноатлантиради. «Пахтакор» ғалаба учун борини беради.

19:00. Бухоро – Сурхон
- Кўрдингиз, «Бухоро» ўтган турда «Динамо»ни ютиб келди. Навбатдаги учрашувга ҳам жиддий тайёргарлик кўришади. Аммо «Сурхон» ҳам жуда яхши жамоа. Бош мураббийи Анвар ака Ғофуровни яхши танийман, ўзим бирга ўйнаганман. Ақлли мураббий. «Сурхон»да ёш футболчилардан зўр жамоа тузиб қўйди. «Бухоро»га қийин бўлади. Барибир улар ўз майдонида ўйнаётгани ҳисобига ғалаба қозонса керак.

24 октябр.
18:00. Насаф – Сўғдиёна
- Бу ҳам яхши ўйин бўлади. Ўз майдонида ўйнайдиган «Насаф» фаворит. Аммо «Сўғдиёна» ҳам қаршилик кўрсатади. Жиззахликлар Кубок баҳсидан ҳам чиқиб кетишди. Энди Қаршидаги учрашувга яхши тайёргарлик кўришади. Ўйлашимча, беллашув «Насаф»нинг кичик ҳисобдаги ғалабаси билан якунланса керак.

25 октябр.
16:00. ОКМК – «Қўқон-1912»
- Бу учрашувда ОКМК фаворит, ўз уйида ўйнайди. Мезбонлар ютса керак. Қўқонликлар ҳам қаршилик кўрсатадилар. Хавфли зонадан қочиш учун очколар тўплашга ҳаракат қилишмоқда. Менимча, ОКМК ғолиб бўлади.

18:00. Қизилқум – Локомотив
- Фаворит «Локомотив» деса ҳам бўлади. Ўйлашимча, бу жамоа Кубок чорак финалида «Нефтчи»га қарши энг кучли ўйинини кўрсатди. «Локо» йил давомидаги энг оптимал таркиби билан энг яхши ўйинини намойиш қила олди. «Нефтчи» стадионида ва бундай муҳитда қойилмақом ўйин кўрсатгани учун «Локомотив»га қойил қолдим. Чемпион жамоани қандай мағлубиятга учратиш кераклигини кўрсатиб қўйди. «Қизилқум» ўз майдонида ўйнагани учун албатта қаршилик қилади. Улар ҳам хавфли зонага тушиб қолмаслик учун курашаётган жамоа. Андижондан ғалаба билан қайтгач, ўзини бир мунча ўнглаб олди. Ўйлашимча, Навоийдаги учрашув дуранг билан якунланади.

18:15. Динамо – Андижон
- Бу ҳам яхши ўйин бўлади. «Динамо» ўтган турда уйида «Бухоро»га ютқазиб қўйди. Шунинг учун бу сафар самарқандликлар мухлисларини хурсанд қилиб ғалаба қозонса керак.

26 октябр.
18:30. Хоразм – Навбаҳор
- «Хоразм» ўз уйида яхши футбол кўрсатяпти. «Навбаҳор»га қийин бўладию, лекин ҳозирда кучли учталикка курашишмоқда. Шу сабабли наманганликлар меҳмондан ғалаба билан қайтса керак.