Саудия Арабистони футбол федерацияси мамлакат чемпионатининг 7-туридан ўрин олган «Ат Таъавун» — «Ал Ҳилол» (0:6) учрашувида содир бўлган воқеа юзасидан расмий баёнот берди.
Ўйин давомида мезбон жамоанинг айрим мухлислари «Ал Ҳилол» яримҳимоячиси Рубен Невешни атайин жаҳлини чиқариш мақсадида унинг Португалия миллий жамоасидаги собиқ шериги Диогу Жота номини айтиб бақиришган.
«Саудия Арабистони футбол федерацияси ва Саудия Арабистони Профессионал лигаси «Ат Таъавун» ва «Ал Ҳилол» ўртасидаги учрашувда айрим мухлислар томонидан содир этилган номақбул хатти-ҳаракатларни қоралайди.
Содир бўлган воқеа Саудия Арабистони футболи қадриятлари ва тамойилларига зид. Фожиалардан провокация мақсадида фойдаланиш мутлақо номақбул хатти-ҳаракат эканини ва бунга Саудия Арабистони футболида ўрин йўқлигини таъкидлаймиз.
Тегишли қўмиталар амалдаги қоида ва тартибларга мувофиқ зарур чораларни кўради. Жараён якунланганидан сўнг унинг натижаси эълон қилинади», — дейилади федерация баёнотида.
Мухлислар бу янгиликни Telegram’да муҳокама қилмоқда
Изоҳлар Telegram’да очилади