Аргентина миллий жамоасининг собиқ бош мураббийи Хорхе Сампаоли замонавий футбол ривожи ҳақида фикр билдирди.
Мутахассиснинг айтишича, бугунги футбол тобора индивидуал ҳаракатларга асосланиб бормоқда.
«Ҳозирги кунда Кройфф ғояларининг энг ёрқин давомчиси — «Манчестер Сити»даги Пеп Гвардиола. У позицион ўйин ва рақиб майдонида устунлик қилиш фалсафасини ривожлантирди. Аммо бундай ёндашувни фақат бир нечта жамоа қўлламоқда», — деди Сампаоли.
Унинг фикрича, футбол тобора яккама-якка курашларга таянадиган спорт турига айланмоқда.
«Ўйинчилар ўртасида мулоқот камайди. Футбол ўзгарди. Мен жамоавий ўйин кўпроқ бўлишини истардим, чунки айнан шу уни ўзига хос қилади», — дея таъкидлади мутахассис.
Сампаоли замонавий футболни жамиятдаги жараёнлар билан ҳам боғлади.
«Бугунги футбол кўпроқ индивидуал ҳаракатлар йиғиндисига ўхшайди. Бу жамият аксидир — инсон тобора ўзига қаратилган, ўз дунёсига шўнғиган. Бундай шароитда жамоа қуриш қийинлашмоқда, шунинг учун бу тенденцияга қарши курашиш керак», — деди у.
