Роналдунинг онаси: «Ўғлим олд эшикдан парад билан чиқиб кетиши мумкин эди, аммо орқа эшикдан кетди»

Криштиану Роналдунинг онаси Долореш Авейру ўғлининг Жорже Жезуш билан юзага келган зиддият фонида Португалия миллий жамоасини тарк этганига муносабат билдирди.

«Хафа бўлганим — табиий ҳол. Бу мен учун шок бўлди. Ўғлим олд эшикдан парад билан чиқиб кетиши мумкин эди, аммо у орқа эшикдан кетди. Лекин, майли, ҳаммасини Яратганнинг ўзи изга солади…

Бироз йиғладим. Ҳис-туйғуларни ташқарига чиқариш ҳам яхши. Энди бу саҳифани ёпиб, олдинга қараш керак.

У менга: «Она, хавотир олманг, ҳаммамиз бирга бўлганимизда сизга ҳақиқатни айтиб бераман», деди. Мен эса: «Хўп, ўғлим, буни ҳам бошдан ўтказишимиз керак», деб жавоб бердим. Шу билан гап тугади.

Унга тинчланишни айтдим, аммо у ўз ақли билан шундай қарорга келди. Кўрамиз, нима бўлар экан. Уни қўллаб-қувватладим, лекин бу ёрдам бермади.

Лекин у Португалия учун жуда кўп иш қилди. Шунинг учун ҳамиша биз билан бўлади. У доимо Португалия қаҳрамони бўлиб келган. Криштиануни муносиб даражада қадрлашмаяпти», — деди 71 ёшли аёл TV 7 Dias нашрига берган интервюсида.