«Барселона» ҳимоячиси Жюл Кунде ёзги трансферлар ойнасида жамоасини ўзгартириши мумкин. «Реал» франциялик футболчига жиддий қизиқиш билдирмоқда. Бу ҳақда Topskills Sports UK хабар берди.
Ҳозирда Кунде каталонияликлар учун муҳим ўринга эга футболчи сифатида қаралмоқда. Бироқ клубга 60–80 миллион евро атрофида таклиф тушса, «кўк-анорранглилар» трансфер вариантини кўриб чиқишга тайёр. Шунингдек, ҳимоячига «Челси» ҳам қизиқиш билдирмоқда.
Кунденинг «Барселона» билан амалдаги меҳнат шартномаси 2030 йилгача мўлжалланган. Бу мавсум 27 ёшли футболчи барча мусобақалар доирасида 36 та ўйинда майдонга тушиб, 3 та гол ва 2 та ассистга муаллифлик қилди.
Transfermarkt портали унинг нархини 65 миллион евро деб баҳоламоқда. Аввалроқ «Барселона» яримҳимоячиси ёзда клубни тарк этиши мумкинлиги маълум қилинганди.
