«Рома», «Ювентус», «Барселона» ва ЦСКА клубларида тўп тепган собиқ яримҳимоячи Миралем Пянич собиқ жамоадошлари Лионел Месси ва Криштиану Роналду ҳақида фикр билдирди.
«Месси ва Роналду ҳали ҳам Франческо Тоттидан бироз устун. Лекин биринчи ўринга Мессини қўяман.
У билан бир йил бирга ўйнадим ва машғулотларда унда ҳамма нарса худди Худонинг инъомидек табиий чиқиши мени ҳайратга соларди. У биз бузиб қўйишимиз мумкин бўлган барча нарсани тўғрилаб қўярди.
Роналду билан «Ювентус»да икки йил бирга ўтказдик. Барча ёш футболчилар ундан ўрнак олишлари керак. Баъзида унинг ҳам хатога йўл қўйганини кўриш мумкин эди, аммо у ҳеч қачон таслим бўлмасди.
У билан бирга Чемпионлар Лигасида ғолиб бўлмаганимдан афсусдаман, чунки ўша жамоада бу совринни қўлга киритиш учун етарлича салоҳият бор эди», — дея Миралемнинг сўзларини келтиради Juventusnews24 нашри.
Аввалроқ Пянич профессионал футболчилик фаолиятини якунлагани маълум қилинганди.
