BMF камари собиқ эгаси Макс Ҳоллоуэй Конор Макгрегорга қарши бўлажак жанг ҳақида фикр билдирди.
«Кўпчилик Макгрегор октагонга чиқмаслигини айтяпти. Унинг умуман машқ ҳам қилмаётгани айтиляпти. Лекин у жойлаётган постларига қарасак, Конор режа билан иш қилаётган кўринади ва менимча, у жиддий тайёргарлик кўряпти.
Назаримда, у спортни соғиниб қолган ва октагонга қайтишни жуда истаяпти. Шунинг учун бу имкониятдан хурсандман ва 11 июлни интиқлик билан кутяпман.
Ўйлайманки, Конор маълум бир пайтгача ҳурмат билан ҳаракат қилади, аммо бу йигитда нотиқлик иқтидори бор. Агар у гап бошласа, бу жангда сиз менинг Вайанаэлик ҳақиқий қиёфамни кўришингиз мумкин.
Чунки кўпчилик билмайди, мен ҳам гапиришни яхши кўраман, фақат бундан кам фойдаланаман. Агар у шу йўлни танласа, мен ҳам мамнуният билан жавоб қайтараман.
Мухлислар бу жангдан завқ олишади. Иккимиз ҳам ажойиб формада бўладиган вазн тоифаси. Жангни чўзмоқчи эмасман, шов-шувли якунга интиляпман. Катта аудитория бўлади, мен эса шовқин солмоқчиман», — деди Макс.
Эслатиб ўтамиз, Макгрегор ва Ҳоллоуэй 11 июл куни Лас-Вегасда бўлиб ўтадиган UFC 329 турнири доирасида жанг қилади.
