«Атлетик» вингери Нико Уилямс ҳануз чов соҳасидаги (қориннинг пастки қисми) оғриқлардан қийналмоқда.
Маrca нашри ёзишича, футболчининг жисмоний ҳолати испан клуби учун жиддий муаммога айланган. 23 ёшли Нико ўтган мавсумдан бери давом этаётган чов соҳасидаги оғриқлар сабабли ўзининг энг яхши спорт формасидан йироқ.
Испаниялик вингер ҳолатидан жуда хавотирда. Операция қилиш вариант сифатида кўриб чиқилмоқда, бироқ бу энг охирги чора ҳисобланади, чунки энг яхши ҳолатда ҳам тикланиш икки ойдан кўпроқ вақтни олади.
Таъкидланишича, ҳозиргача олиб борилган консерватив даволаш кутилган натижани бермаган. Нико майдонга қайтишдан олдин маълум вақт беллашувларда иштирок этмади ва тикланиш ҳамда профилактика бўйича махсус тавсияларга амал қилди. Бироқ оғриқлар йўқолмаяпти, бу эса футболчи учун мавсумнинг қолган қисмини хавф остига қўймоқда. Бундан ташқари, ушбу муаммо унга келаси ёзда бўлиб ўтадиган жаҳон чемпионатида қатнашишга ҳам халал бериши мумкин.
Аввалроқ Нико Испания суперкубоги учрашувларини ўтказиб юборганди. У Чемпионлар Лигасида атиги 3 марта майдонга тушди, шунингдек, Ла Лигада 17 та ўйинда 4 та гол урди.
Аввалроқ Уилямс фаолиятини «Тоттенҳэм»да давом эттириши мумкинлиги хабар қилинганди.
