Нико Пас Жаҳон чемпионатини ўтказиб юбориши мумкин

«Комо» клуби ва Аргентина миллий жамоаси яримҳимоячиси Нико Пас тиззасидан олган жароҳати сабабли жаҳон чемпионатига бормаслиги мумкин.

AS нашри маълум қилишича, 21 ёшли ҳавбек 10 май куни А Серия доирасидаги «Верона»га (1:0) қарши беллашувда олган тизза жароҳатидан ҳали ҳам тўлиқ тиклана олмаяпти.

Аввалига ушбу жароҳат футболчининг жаҳон чемпионатида иштирок этишига тўсқинлик қилмайди, деб ҳисобланганди. Бироқ ҳозир мураббийлар штаби футболчининг тикланиш муддати бўйича шубҳаланишмоқда. Жароҳат аввал тахмин қилинганидан кўра жиддийроқ бўлиши эҳтимоли ҳам мавжуд.

Айни пайтда Паснинг жаҳон чемпионатида қатнашиши очиқ қолмоқда. Якуний қарор қабул қилиниши учун унинг ҳолати ҳар куни кузатиб борилади.

Аввалроқ «Реал» ўз тарбияланувчиси бўлган Нико Пасни ёзда қайта сотиб олишни режалаштираётгани ҳақида хабар берилганди.