Италиялик мутахассис Тиаго Мотта мураббийлик фаолиятини тиклашга яқин турибди.
Инсайдер Николо Скиранинг хабар беришича, 43 ёшли мутахассис хизматларига айни пайтда учта нуфузли клуб — «Лацио», «Лилл» ва Леверкузеннинг «Байер» жамоалари жиддий қизиқиш билдирмоқда.
Моттанинг ўзи ҳам яқин келажакда мураббийлик курсисига қайтишга тўлиқ тайёр эканини маълум қилган.
Эслатиб ўтамиз, унинг сўнгги иш жойи Туриннинг «Ювентус» клуби бўлган эди. Бироқ унинг «зебралар»даги фаолияти узоққа чўзилмади — мутахассис қониқарсиз натижалар туфайли 2025 йилнинг март ойида истеъфога чиққанди.
Маълумот учун, Мотта мураббийлик фаолияти давомида, шунингдек, «Болоня», «Специя» ва «Женоа» клубларини ҳам бошқарган.
