Маркус Форсс — «Нефтчи» футболчиси

Ўзбекистон чемпиони «Нефтчи» клуби финляндиялик ҳужумчи Маркус Форсс билан шартнома имзолаганини эълон қилди.

«1999 йил 18 июнда Финляндиянинг Турку шаҳрида туғилган Маркус Уолеви Форсс — марказий ҳужумчи сифатида фаолият юритадиган, зарур ҳолатларда ҳар икки қанотда ҳам ўйнай оладиган футболчи. Унинг бўйи 1,82 метр, асосий оёғи — ўнг.

Форсс футболчилик фаолиятининг катта қисмини Англиянинг профессионал футбол тизимида ўтказган. 13 ёшида «Вест Бромвич» академиясига қўшилган футболчи кейинчалик «Брентфорд» тизимида фаолиятини давом эттирган ва 2018 йилда клубнинг асосий жамоасида дебют қилган.

«Брентфорд» сафида Форсс 2018–2022 йиллар давомида тўп тепди. 2019/20 йилги мавсумда ижара асосида «Уимблдон» сафида ҳаракат қилиб, 18 та баҳсда 11 та гол урди. Кейинчалик «Ҳалл Сити» сафида ҳам ижара асосида ўйнади.

2022 йил ёзида Маркус «Мидлсбро» футболчисига айланди. Англиянинг Чемпионшип лигасида жамоанинг муҳим ҳужумчиларидан бири бўлган Форсс клуб сафида барча мусобақаларда 90 дан ортиқ баҳсда майдонга тушиб, 18 та гол урди.

2025/26 йилги мавсумни эса ижара асосида «Болтон» сафида ўтказди.

Маркус Форсс — Финляндия миллий жамоаси аъзоси. У мамлакатининг U-17, U-18, U-19 ва U-21 миллий жамоаларида ҳам ўйнаган. 2020 йил ноябр ойида Финляндия бош жамоасида дебют қилган. Илк халқаро ўйинида Францияга қарши майдонга тушиб, дебютини гол билан нишонлаган. Форсс Финляндиянинг Евро-2020 таркибидан ҳам жой олган. Миллий жамоа сафида ҳозирга қадар 21 та ўйинда 2 та голга муаллифлик қилган.

Форсс энди ўзининг Англиядаги катта футбол тажрибасини Фарғонага олиб келади.

Маркус, «Нефтчи»га хуш келибсиз!», — деб ёзади клуб матбуот хизмати.

Эслатиб ўтамиз, 27 ёшли ҳужумчи фарғоналикларга фақат Элит ОЧЛда ёрдам бера олади.