Малайзиянинг «Жоҳор Дарул Тазим» клуби миллий чемпионатда кетма-кет мағлубиятсиз ўтказилган ўйинлар сони бўйича жаҳон рекордини ўрнатди. Бу ҳақда Reuters хабар берди.
Янги мавсумнинг 1-турида «Жохор» «Кучинг»ни 3:0 ҳисобида мағлуб этди. Шу тариқа, клубнинг чемпионатдаги мағлубиятсиз серияси 109 та ўйинга етди.
Қайд этиш лозим, Малайзия клуби ушбу натижа бўйича Кот-д’Ивуарнинг «АСЕК Мимозас» жамоаси рекордини янгилади. Ушбу клуб 1989 йилдан 1994 йилгача миллий чемпионатда кетма-кет 108 та учрашувда мағлуб бўлмаганди. «Жоҳор» эса ўтган мавсумнинг сўнгги учрашувида бу натижани такрорлаганди.
Маълумот ўрнида, жамоа миллий чемпионатнинг сўнгги тўрт мавсумида чемпионликни қўлга киритди ва 2021 йил апрел ойидан буён Малайзия чемпионатида мағлубиятга учрамаган.
Аввалроқ «Жоҳор Дарул Тазим» «Челси» билан 3:3 ҳисобида дуранг ўйнагани маълум қилинганди.
