«Пахтакор» ҳакамлар устидан шикоят киритди

Тошкентнинг «Пахтакор» клуби жамоанинг «Сурхон»га қарши ўйин (0:0)ида ишлаган ҳакамлар устидан шикоят киритди. Бу ҳақда клуб матбуот хизмати хабар берди.

«Суперлига 18-туридан ўрин олган «Пахтакор» — «Сурхон» ўйинининг 90+3-дақиқасида Ҳожимат Эркинов томонидан урилган гол ҳакамлар томонидан бекор қилинди. «Пахтакор» жамоаси камерасидан олинган кадрда офсайд йўқлиги кўриниб турибди.

Голни бекор қилиш жараёнида VAR тизими орқали ҳакамларнинг қандай мулоқотда бўлгани биз учун қизиқ. Офсайд эҳтимоли бор футболчи тўғридан-тўғри тўпга ўйнамаган, дарвозабон тўпни бемалол қаршиликсиз тўхтатиб, тепиб юбориш жараёнида хатога йўл қўйган.

Бу ҳолатда ўйин давом эттирилиб, навбатдаги ҳолатга (фаза) ўтиб кетгани сабабли голни VAR орқали бош ҳакам ўзи кўрибгина бекор қилиши мумкин — футболчининг рақибга халал бериш ҳолати бўйича (ўйиндан ташқари ҳолат бўлган ҳолатда).

Қоидаларга кўра, ҳимояланаётган жамоа футболчиси тўпга онгли ўйнаган-ўйнамаганини аниқлашда бош ҳакам монитор олдига чақирилиши керак.

Тўп узоқ масофадан аниқ кўриниб турган ҳолда етиб келган, секин ҳаракатланган, ҳимояланаётган жамоа футболчиси тўпни назорат қилиш ва тана ҳаракатини мувофиқлаштириш учун етарли вақтга эга ҳолатда офсайдни аниқлаш VAR протоколига кўра, бош ҳакамни мониторга чақириш орқали бекор қилиниши мумкин.

Бироқ ВАР ҳаками бу голни қандай қилиб бекор қилгани бизга қоронғу. Агар биз шаффофлик, очиқлик билан ишлаётган бўлсак, ундай ҳолда VAR аудиоёзувларининг ЎзФҲМ томонидан эълон қилинишини кутамиз.

ЎзПФЛдан ҳам бу масалада кўмак кутамиз, чунки бу ташкилот клублар ҳуқуқини ҳимоя қилишда иштирок этиши лозим. Ўзбек футболида адолат, очиқлик ва шаффофликни истасак, унда ҳар бир ўйинда муҳокамаларга сабаб бўлган ҳолатлар аудиоёзувлари очиқчасига тақдим этилсин.

Ҳакамлар тайинлануви борасида ҳам саволлар етарлича. 5 йилга футболдан четлатилган ва узоқ вақт ўйинларни бошқариш амалиётисиз юрган Жасур Мухторов 2026 йилнинг ўзида, ҳакамликка қайтганининг тўлақонли биринчи йилида ҳозиргача 11 беллашувда бош ҳакам сифатида ишлади.

Биринчи мавсумнинг ўзида бунчалик кўп ўйинларда ишлаш жаҳон даражасидаги ҳакамларга ҳам насиб этмаган. Ўйин давомида у футболчиларимизга нисбатан ишлатилган бир неча қўполликларни эътиборсиз қолдирди.

Мухторов 2 тур аввал Тошкентда «Бухоро»га қарши беллашувда рақиб қўполлик ишлатиб урган голни VARда ишлаганда инобатга олганди. «Сурхон» билан беллашувда VAR ҳаками Равшан Абдувоҳидов 3 тур олдин жамоамиз иштирокидаги ўйинда рақибнинг кўплаб қўполликларини эътиборсиз қолдирганди. Кеча ВАР орқали чиқарган нотўғри қарори «Пахтакор»ни муҳим очколардан махрум қилди.

Ҳакамлар, уларнинг даражаси, уларнинг қанчалик виждонан ишлаётгани ҳакамлик ишини таҳлил қилувчи ва жавобгар ташкилотлар томонидан кўриб чиқилиб, бу борада очиқ баёнот берилишига чақирамиз», — дейилади хабарда.