Германия миллий жамоасининг собиқ бош мураббийи Йоахим Лёв мамлакат футболидаги муаммолар Бундеслигадан бошланишига ишонмоқда. Мутахассис чемпионатдаги аксарият жамоаларнинг ўйин услубидан қониқмаётганини билдирди.
«Биз ижодкорлик ва жасоратни рағбатлантиришимиз, футболчилардан ҳам шуни талаб қилишимиз керак. Ўйин суръатини биз белгилашимиз лозим, рақиб эса бизнинг услубимизга мослашиши керак, аксинча эмас. Бундеслигада кўплаб жамоаларнинг рақиб ҳаракатларига жавоб қайтариш асосида ўйнаётганини кўряпман. Бундай футбол менга ёқмайди», — дея Лёвнинг сўзларини келтиради derbyderbyderby.it.
Собиқ мураббий фикрича, немис футболида жамоалар ташаббусни ўз қўлига олиши, ўйинни рақибга мослашиш орқали эмас, ўз услуби асосида қуриши керак.
Маълумот учун, Йоахим Лёв 2006–2021 йилларда Германия миллий жамоасини бошқарган. Унинг қўл остида немислар 2014 йилги жаҳон чемпионатида ғолиб чиққан.
Эслатиб ўтамиз, «Бавария» Германия чемпионатининг амалдаги чемпиони ҳисобланади.
Мухлислар бу янгиликни Telegram’да муҳокама қилмоқда
Изоҳлар Telegram’да очилади