Франк Лэмпард «Ковентри Сити» билан муваффақиятга эришганига қарамай, жамоани тарк этиши мумкин. Бу ҳақда журналист Ричард Кейс маълум қилди.
Манбага кўра, мутахассиснинг кейинги манзили «Челси» эмас, балки «Фулҳэм» бўлиши эҳтимоли юқори. Кейс ўз блогида бу вариант энг реал сценарий эканини таъкидлаган.
Қайд этилишича, Лэмпарднинг «Ковентри» билан шартномаси яна бир йил амал қилади ва янги битим бўйича келишув ҳали тузилмаган. Шу сабаб Премер-лига клублари мураббийга қизиқиш билдирмоқда.
«Агар Лэмпард кетса, эҳтимол «Фулҳэм»га ўтади. Унинг номи айнан шу клуб билан кўп боғланмоқда», — деди Кейс.
Шунингдек, «Фулҳэм» бош мураббийи Марку Силванинг келажаги ҳам ноаниқ бўлиб қолмоқда, бу эса Лондон клубини янги мутахассис излашга мажбур қилиши мумкин.
Маълумот учун, Лэмпард «Ковентри»ни Чемпионшипда 95 очко билан чемпион қилиб, жамоани 25 йиллик танаффусдан сўнг АПЛга олиб чиқди.
