Ўзбекистон футболчи уюшмаси бош директори, собиқ футболчи Камолиддин Мурзоев тур олдидан жамоаларнинг имкониятларини қуйидагича баҳолади.
18 август
19:00. «Сўғдиёна» - «Қизилқум»
- Доимгидек қийин жуфтликлар. Очиғини айтганда, сўнгги турларда Суперлига ўйинларини кузатиш жуда қизиқарли кечяпти. Чунки жамоалар ўртасидаги тафовут унчалик катта эмас. Тўғри, чемпионлик учун курашадиган клублар аниқланган. Пастки қисмда жон сақлаб қолиш учун курашаётган жамоалар аниқланган бўлса-да, барибир ҳар турда қизиқарли ҳамда қийин учрашувлар бўлиб ўтяпти.
«Сўғдиёна» билан «Қизилқум» тенг рақиблар. Сўнгги учрашувларга қарайдиган бўлсак, устунлик жиззахликлар томонида. Охирги учта ўйинда ғалаба қозонишган. Лекин иккинчи фактор ҳам борки, 100 фоиз ғалаба қозонади, деб бўлмайди. Чунки «Қизилқум» жамоаси ҳам иккинчи даврада ўзгаришларни қилган, мураббий ҳам янгиланган. Менимча, қизиқарли учрашув бўлади. Имкониятларга келсак, 55\45 «Сўғдиёна» фойдасига.
20:00. «Бухоро» - «Нефтчи»
- Бу кейинги катта жуфтлик. «Бухоро»ни бу йилги ўтказаётган ўйинларидан мақсад юқорилиги кўриниб турибди. «Нефтчи» яна бир бор чемпионликка эришиб, натижаларга эришиш йўлида курашяпти. Бу жамоалар ўртасидаги учрашувни Бухорода ўтишини инобатга олиниб, 50\50 сифатида баҳоласак бўлади.
19 август
19:00. ОКМК - «Динамо»
- Боя таъкидлаб ўтганимдек, бир турда бир эмас, 3-4 та жуда яхши қарама-қаршиликлар бўляпти. Ўша ўйинларни бир вақтда ёки ярим соат фарқи билан бошланганида қайси бирини кўрсам экан, деган саволлар ҳам бўляпти. Мураббийлар ва жамоаларнинг ўйин услублари томонидан яна бир икки тенг рақиб. Фақат сўнгги турларда ўзлари хоҳлаётган натижаларни кўрсата олмаётган рақиблар. Бу ерда ҳам имкониятларни 50\50 десак бўлади.
20:00. «Машъал» - «Андижон»
- «Машъал» жуда қийин мавсумни ўтказяпти. Мусобақани ярмидан кейин бошланган стартда бироз ўзига келиб олгандек кўринганди. Умуман олганда, жуда қийин аҳволда. Назаримда, «Машъал» «Андижон»га қарши ўйинда борини ташлайди. Чунки уларда ортиқ чекинадиган йўл йўқ. «Андижон» аста-секинлик билан ўз ўрнини топиб олишга ҳаракат қилаётган жамоа. Шундай бўлса-да, улар ҳам сафарда ўзини кўрсатишга интилади. Таркиб ва ўсиб келаётган ўйин жиҳатидан бироз устунликни «Андижон»га берган бўлардим.
20 август
19:00. «Бунёдкор» - «Қўқон-1912»
- Бу ерда ҳаммамизга маълум ва ачинарли ҳолат. «Бунёдкор»ни жуда қийин ҳолатдалиги ва шу билан бирга ўтказаётган учрашувларидаги ўйин услуби кўпчиликка мамнун бўляпти. «Навбаҳор»га қарши ҳам яхши ўйнашди. Илёс Зейтуллаев илгари сураётган футбол кўпчиликка ёқяпти. Қўқонликлар биринчи даврада бир қатор учрашувларда кўпчиликка ёқадиган ўйинлар кўрсатганди. Кейинчалик бироз омади келмаётганди. «Бунёдкор»ни ўз уйида ўйнаётганини ҳисобга олиб, бироз устунлик 55\45 мезбонлар фойдасига. Ким кўпроқ руҳий ҳолатдан тайёр бўлса ютиб кетиши мумкин.
20:00. «Хоразм» - «Локомотив»
- Яна иккита футбол ўйнайдиган жамоалар. «Хоразм» ҳар қандай рақибга қарши майдонга тушаётганида қўрқув йўқ, шижоати бор. «Локомотив» эса очиғини айтаман, мусобақа бошланганида бери ўз ўйини билан тўлиқ жалб қилаётган ва ёқаётган жамоа. Менга ўйини ёқади. Майдон фактори аралашуви бўлмаса 100 фоиз 50\50. Чунки «Локо» уйда ё сафарда бўладими, ўзини футболини қураётган жамоа. Менимча, голларга бой бўлади ва ким кўпроқ гол урса ўша жамоа ютади.
21 август
19:00. «Навбаҳор» - «Насаф»
- Катта номлар. Бошқа жуфтликларга ҳурмат сақлаган ҳолда уларни мусобақаларимиздаги ўрни, кўрсатаётган ўйинлари нуқтаи назаридан турнинг марказий учрашуви бўлади. Иккала жамоа ҳам футбол ўйнайди. Ўйин Наманганда ўтишини ҳисобга олиб, бироз устунликни мезбонларга берамиз. Томошабоп ўйин бўлади, деб ўйлайман.
20:00. «Пахтакор» - «Сурхон»
- «Пахтакор»ни ОЧЛ плей-оффида ва чемпионатдаги сўнгги турда кўрсатган ўйинини ҳисобга олган ҳолда айтиш мумкинки, бошқа рақибларга нисбатан каттароқ устунлик берган бўлардим. Шу билан бирга «Сурхон» «Пахтакор» учун ноодатийроқ рақибга ҳам айланиб боряпти. Буни ҳам эсдан чиқармаслик керак. Имконият 60\40 мезбонлар фойдасига.
