Африка футболида тарихий воқеа юз берди — Кабо-Верде терма жамоаси илк бор Жаҳон чемпионатига йўлланма олди. Бу кичик орол давлати 2026 йилги мундиалга йўл олган 22-жамоа сифатида футбол тарихида ўз номини қолдирди. Аҳолиси атиги ярим миллиондан ошган мамлакат илгари ҳеч қачон бундай йирик турнирда қатнашмаган эди.
Кабо-Верде ЖЧ-2026 саралаш босқичида кучли Камерунни ортда қолдирди. Африка минтақасида гуруҳ ғолиблари тўғридан тўғри жаҳон чемпионатига чиқади ва Кабо-Верде ўз гуруҳида биринчи ўринни эгаллади. Улар Ливия, Ангола, Маврикий, Эсватини ва Камерун билан рақобатда тўрт очколик устунлик билан ғалаба қозонди. Энг муҳим ўйин 8-турда бўлиб ўтди. Кабо-Верде Камерунни 1:0 ҳисобида мағлуб этди ва деярли йўлланмани кафолатлаб олди. Сўнгги турда эса Эсватини устидан 3:0 ҳисобида ғалаба қозониб, тарихий натижани мустаҳкамлади.
Жамоанинг ғалабали голларини Даилон Ливраменто, Вилли Семеду ва 37 ёшли ҳимоячи Стопира уришди. Футболчилар ўз майдонида, атиги 15 минг томошабинга мўлжалланган стадионда, тарихий кечани нишонлашди.
Айтиб ўтиш керакки, Кабо-Верде терма жамоасининг асосий қисмини Европа клубларида тўп сураётган футболчилар ташкил этади. Улар Португалия, Кипр, Ирландия, Венгрия, Финляндия, Исроил, ҳатто АҚШ ва Саудия Арабистонида ўйнашади. Энг таниқли футболчи — 35 ёшли вингер Райан Мендеш бўлиб, у миллий жамоа тарихида энг кўп ўйин ўтказган ва энг кўп гол урган футболчи ҳисобланади. Шунингдек, собиқ «Бенфика» дарвозабони Бруну Варела ва узоқ йиллар Венгрияда ўйнаган ҳимоячи Стопира ҳам жамоанинг таянч футболчилари саналади.
Маълумот учун, Кабо-Верде 1975 йилда мустақилликка эришган ва 1982 йилда футбол федерациясини ташкил этган. Улар жаҳон чемпионатига илк бор 2000 йилда саралашда қатнашган. 25 йилдан сўнг, бу орзулар ниҳоят ҳақиқатга айланди. Кабо-Верде илк бор Жаҳон чемпионатида иштирок этади. Бу кичик орол давлати учун футбол тарихидаги энг ёрқин саҳифа бўлди.
