«Пахтакор» клуби ўз уйида «Андижон»ни 3:0 ҳисобида мағлубиятга учратди. Беллашувдан кейинги матбуот анжуманида меҳмонлар устози Ислом Аҳмедов журналистларнинг саволларига жавоб берди.
- Ассалому алайкум. Аламли мағлубиятга учрадик. Бунинг учун Андижондан ташриф буюрган мухлисларимиз олдида узр сўраймиз. Ўйинга келадиган бўлсак, ўзига хос режа қилгандик. Биринчи таймда ҳисобни ушлаб турган ҳолда иккинчи таймда янги кучларни қўшиб, ҳаракат қиламиз, деб шундай режа асосида ишлаган эдик. Лекин 20-дақиқагача ўйинчиларимиз яхши ўйнади. Ана шу битта бурчак тўпидан гол ўтказиб юборганимиздан кейин ҳаммаси бузилиб кетди — режамиз. Ортидан иккинчи голни ҳам ўтказиб юбордик. Болалар мувозанатни йўқотиб қўйишди. Шунинг ҳисобидан кўп нарсани топшириб қўйдик. Ўртани бериб қўйдик. Иккинчи таймда янги кучларни майдонга тушириш ҳолатида режамиз бор эди. Яна қизил карточка кутилмаганда режамизни бузиб юборди.
⸻ Сизнинг жамоангизни кузатаман, кўраман, жанговор характер билан ва ҳар доим сиз фақат ҳужумда ўйнайсиз. Лекин баъзи жойларда сизнинг жамоангизга баланс етишмаяпти. Шунинг эвазига қандайдир салбий натижалар кузатилмаяптими?.
- Тўғри айтяпсиз. Агар ҳисоб 0:0 шундай ҳолатда бўлганда, яъни сиз айтгандек, таваккалчиликка йўл қўймасдан, ҳимоячини тушириб, ўша ҳисобни сақлаб қолиш мумкин эди. Лекин биз энди 0:2 ҳисобида ютқазаётгандик. Шунинг учун барибир олдинга ўтмасак бўлмас эди. Ҳужум қилиб, ҳисобни тенглаштиришга, таваккалчилик қилдик.
- Тўғри айтяпсиз, лекин “Пахтакор”га қарши биринчи учрашувда 0:0 ҳисоби қайд этилганди ва ўшанда сиз марказий ҳимоячи Чаласан четлатилгач, барибир ҳужум ҳақида ўйлагандингиз...
- Унда бизда Александр Андроникашвили бор эди. У шундай позицияда, яъни охирги ҳимоячи бўлиб ўйнай оларди. Чунки у аввалги жамоасида шу позицияда ўйнаган. Шунинг учун уни пастга тушириб туриб, яъни олдига ўйинчи чиқарардик. Бу ўйинда ютқазаётгандик, шунинг учун энди ҳимояни ушлагандан кўра, таваккал қилиб, охиригача курашдик, барибир 2:0 га ютқаздингизми, 3:0 га ютқаздингизми, барибир мағлубият. Шу боис ҳужумлар қилиб, ҳисобни яқинлаштиришга ҳаракат қилдик.
- Афсуски, бу сафар яна қизил карточка бўлди. Балки асосий таркибда Артём Потапов эмас, балки Элдор Адҳамов тушганида вазият бошқача бўлиши ҳам мумкин эди. Бунга фикрингиз қандай?
- Дарвозабонлар бўйича мураббийимиз билан маслаҳатлашамиз. Дарвозабонлар мураббийи бор. Охирги ўйинларда Потапов яхши тураётганди. Дарвозаси дахлсизлигини сақлаётганди. Яхши турган дарвозабонни алмаштириб юбориш нотўғри бўлади, деб ўйлагандик. Шунинг учун унга имконият бергандик.
- Драган Черан нега захирада қолди?
- Режамиз бўйича Драганни майдонга тушириш бор эди. Ўйиндан олдин ўзи гаплашгандик, иккинчи таймда у билан кучайтиришни режа қилган эдик. Лекин қизил карточка ҳаммасини ўзгартириб юборди. Бизда Бекзод Сулаймонов ҳам бор ва у ҳимоячи ролида ҳам ўйнай олади, ҳужумга бориб-келиб ўйнайди. Шунинг учун шу ўйинчини туширишга туширдик-да. Қизил карточка ҳамма режамизни бузиб қўйди.
- Биринчи даврани олиб қарайдиган бўлсак, Биринчи даврда Бабаян келди. 6 та ўйин ўтказди. 2 та ғалаба, 4 та мағлубият бўлди. Сиз «Қўқон-1912» билан ўйиндан бошладингиз. Ўртамиёна жамоаларга қарши барқарор очко тўпладингиз. Мана, иккинчи давра бошланди, «Нефтчи»га, «Пахтакор»га имконият бой берилди. Ислом Аҳмедов эффекти фақат ўртамиёна жамоалар учунми ёки катта жамоаларни ҳам юта оладими?
- Биринчи даврада «Бунёдкор» билан ўйнаганимизда, улар учинчи ўринда эди ва яхши жамоа эди. Масалан, «Хоразм» ҳам унча пастда эмас эди. Биринчи даврадаги «Пахтакор» ёки «Нефтчи» билан ўйинни солиштирадиган бўлсак, натижа бўйича ютқаздик. Лекин ўйин бўйича, ҳужумкорлик, тўп назорати бўйича яхшироқ эдик. Яъни, ютқазишни ютқазишдан фарқи бор. Ҳужумлар қиляпмиз, тўп назорати бор, ҳар хил ҳаракат қиляпмиз, қаердадир ўзимизнинг хатоларимиздан ҳам гол ўтказиб юбориб, шундай бўлди. «Нефтчи» билан ҳам биринчи тайм ёмон ўйнаганимиз йўқ. Унда ҳамма томонлама устунлик қилдик. Фақат айтганимиздек, яна қизил карточка ҳисобига ютқазгандик.
- Биринчи даврага нисбатан ўйин услуби ўзгарди, ҳаракат кўпайди, нисбатан тезлик қўшилди. Жамоани «қурол» борми? Мисол учун, Хомяков пайтида стандартларда хавфли эди. Иккинчи қаватда имконият бермасди. Ҳозир «Андижон»ни «қурол» борми?
- Тўғри айтяпсиз. Бизда бўйдор ўйинчиларимиздан Боаке ва Черан бор. Лекин Драган кўпроқ орқароқдан пас беради. Шунинг учун шу ўйинчиларимизнинг кучли томони — улар тўпни яхши назорат қила олади. Интеллекти яхши. Футболчиларимизнинг салоҳиятидан келиб чиқиб, кесувчи паслар, оралардан узатиладиган пасларни қўллаймиз. Стандарт ҳолатлардан ҳам икки-учта жамоага гол урганмиз. Биз кўпроқ тўп назорати, ҳужумкорликка эътибор беряпмиз.
- Потапов ўртамиёналарга қарши яхши ўйнади. Элдор Адҳамов жамоани асосий дарвозабони, жамоа кучли рақиб билан ўйнаётганди. Яна уни асосий таркибда туширса бўлмасмиди?
- Агар ҳамма нарсани олдиндан билганимизда, шунга тайёргарлик кўрардик. Олдиндан ҳеч нарсани била олмайсиз. Масалан, қилган режаларимиз ўхшамади. Чунки ўйин бузилиб кетди. Бошқача режа қилгандик. Кутилмаганда бошида иккита гол ўтказиб юбордик, иккинчи таймда кейин дарвозабонимиз қизил карточка олиб қолди. Режаларимиз бузилиб кетди.
- Ўзбекистон чемпионатининг энг яхши легионерларидан бири деб айтиладиган Черан захирада қолди. Ўтган ўйинда ҳам иккинчи таймда майдонга тушганди. Гап-сўзларга қараганда, мураббийлар штаби билан бироз келишмовчилик бўлган. Бу қанчалик рост?
- Йўқ, орамизда ҳеч қандай муаммо йўқ. Драган билан яқин муносабатдамиз.
Эътибор берган бўлсангизлар, Драганни охирги ўйинларда фақат иккинчи таймда туширяпмиз, ўйинни кучайтириб беряпти. Чунки тўпни назорат қиляпти, шошилмасликка ундаяпти. Яъни, ўйинни бошқаряпти. Рақиблар чарчаган ҳолатда бўш ҳудудлар топиб, ўйинни ўз қўлига олаётганди.Ўйиндан олдин Драган билан ҳар доим гаплашамиз. Шу режа асосида иш тутмоқчи эдик, лекин режамиз ўхшамади. Майдонга тушмаганига барибир футболчининг кайфияти тушиши мумкин, мағлубият ҳам барибир таъсир қилади.
⸻ Демак, ўзи шу ролга кўняптими? Унда норозичилик бўлмаяптими?
- Йўқ, йўқ. Айтяпман-ку, у билан бу борада гаплашиб турамиз, ўзи менга айтади: «Мен иккинчи таймда тушиб, ёрдам берай. Чунки рақиблар чарчаганда», дейди. Ўзидан чиқади, ташаббус. Лекин асосий таркибда ҳам қўяверман. Лекин иккинчи таймда тушиб, ёрдам берай дейди», - дея Ислом Аҳмедовнинг сўзларини келтиради Tribuna.uz журналисти.
