UFC чемпионлик камари учун икки марта даъвогар бўлган америкалик Хорхе Масвидал ташкилот раҳбарияти билан қайтиш масаласида музокара олиб бораётганини маълум қилди.
«UFC билан гаплашдим, ҳаммаси яхши. Шунинг учун янгиликларни кузатиб боринг. Кутганингиздан ҳам эртароқ бирор хабар эшитишингиз мумкин», — дея Масвидалнинг сўзларини келтиради Home of Fight нашри.
Жангчи ҳозир ҳам машғулотларни давом эттираётганини ва рақиблар билан беллаша олишига ишонишини таъкидлади.
«Машқ қиляпман ва ҳали ҳам бу йигитлар билан рақобатлаша олишимни ҳис қиляпман. 50 ёшимда «Қандай натижаларга эришишим мумкин эди?» деб ўйлашни истамайман. Чунки ҳозир ўзимни яхши ҳис қиляпман», — деди у.
Маълумот ўрнида, Масвидал айни вақтда 41 ёшда. У UFC’да 2013–2023 йилларда иштирок этган. Америкалик жангчи ташкилотда жами 12 та ғалаба қозониб, 10 марта мағлубиятга учраган.
Аввалроқ Жон Жонс фаолиятини қайта тиклаш эҳтимолини истисно этмагани маълум қилинганди.
