Гусков: «Ҳакам жангни эрта тўхтатди. Анкалаев финиш қила олмасди»

Ўзбекистонлик жангчи Богдан Гусков Абу-Дабида бўлиб ўтган турнирдан сўнг Магомед Анкалаевга қарши жанг натижаларини сарҳисоб қилди. Тўқнашувда Россия вакили бешинчи раундда техник нокаут орқали ғалаба қозонди.

«Биринчи раундда у ўнг қўлимга яхши мидл-кик (тананинг ўрта қисмига зарба) йўллади ва бу асабларга бироз таъсир қилди. Қўлим ишдан чиқмади, лекин қаттиқ зарбани ҳис қилдим. Бу бироз чалғитди, асосий қуролимдан фойдалана олмадим. Иккинчи раундда ўтиб кетади деб ўйлагандим, аммо бундай бўлмади.

Жанг шахмат партиясига ўхшаб қолди. Икки контр-панчер бир-бирини тутишга ҳаракат қилди. Ҳали жангни қайта кўрганим йўқ, лекин ўйлашимча, у жуда зерикарли чиққан.

Мен UFC'да атиги икки йилдан бери жанг қиламан ва энди шундай рақибга қарши чиқдим. У Россияда ҳам, кейин UFC'да ҳам ўзини кўрсатган, чемпион бўлган. Жангчи нуқтайи назаридан қараганда, беллашув нормал ўтди. Магомедга жуда осон бўлди, деб ҳисобламайман. Мен ҳам айрим вазиятларда зарбаларимни ўтказа олдим.

Беш раундлик жанг учун тайёргарликни ўргандим. Ҳакам жангни бироз эрта тўхтатди. Мен ғалаба ҳақида эмас, балки охиригача чидамли бўлганим ҳақида гапиряпман. Мага мени финиш қила олмасди. Ҳакамга бақирдим: «Нега менга охиригача ишлашга имкон бермадинг?»

Мен уч раундлик жангга тайёрлангандим ва уларни яхши ўтказдим. Бу ерда эса беш раунд ва шундай рақибга қарши атиги 11 кунлик тайёргарлик бўлди. Менимча, ҳеч қандай катта нарса йўқотганим йўқ», — деди Гусков.