Берлиннинг «Юнион» клуби Мари-Луиза Эта жамоанинг ушбу мавсум охирига қадар бош мураббий вазифасини бажарувчи этиб тайинланганини эълон қилди.
Берлинликларнинг аввалги устози Штефан Баумгарт ўз мураббийлар штаби билан бирга истеъфога чиқарилди. Эътиборлиси, жамоа Бундеслига турнир жадвалида 11-ўринда бораётганди.
Этанинг таъкидлашича, жадвалнинг пастки қисмида очколар зич жойлашгани сабабли жамоанинг Бундеслигада қолиши ҳали тўлиқ кафолатланмаган. «Бу осон бўлмаган вазифани менга ишониб топширгани учун клубдан миннатдорман», — деди у «Юнион» матбуот хизматига берган интервюсида.
Шу тариқа, гарчи бу лавозимда вақтинча фаолият юритаётган бўлса ҳам Мари-Луиза Бундеслига тарихида биринчи аёл бош мураббийга айланди.
