«РБ Лейпциг» футболчиси Ян Диоманденинг собиқ агенти «Maxidel Management» компаниясининг унинг амалдаги вакили «Roc Nation»га қарши киритган даъвоси «Реал Мадрид»нинг ивуарлик ўйинчини сотиб олиш жараёнини вақтинча тўхтатиб қўйди.
Трансфер комиссияси бўйича ФИФАгача етиб борган ушбу можаро «қироллик клуби»да катта норозилик уйғотди. Сабаби «Реал» репер Jay-Zʼга тегишли ва Винисиус ҳамда Эндрик манфаатларини ҳимоя қилувчи «Roc Nation» мультимиллионлик агенти билан музокара олиб бораётганда, улар «Maxidel» эгаси Макс Градель билан мавжуд ҳуқуқий низо ҳақида мадридликларни огоҳлантирмаган.
Германия клубининг футболчи учун 100 миллион евродан ортиқ сўраб, молиявий масалада ён бермаётганига энди ушбу кутилмаган муаммо ҳам қўшилди. «Maxidel» Диоманденинг «Лейпциг»ни тарк этгунига қадар бўлган ҳуқуқлари уларга тегишли эканини таъкидламоқда. Бу ҳолат «Реал»ни «Maxidel» билан параллель равишда музокара олиб боришга, икки агентлик ўртасида тезкор (аммо эҳтимоли кам) келишувга умид қилишга ёки ФИФА (тахмин қилинганидек) агентликлар низоси ҳал бўлгунича вақтинчалик трансфер беришини кутишга мажбур қилиши мумкин.
MARCA берган маълумотларга кўра, «Леганес» собиқ футболчиси атрофидаги ягона можаро бу эмас. Деҳ Бамба исмли собиқ вакил ва «Rainbow» номли бошқа бир компания ҳам даъволар билан чиққан бўлиб, бу Диоманденинг трансфер ва имиж ҳуқуқлари масаласини чигал лабиринтга айлантириб юборган.
Тарихнинг бошланиши
Буларни тушуниш учун футболчининг фаолияти бошига назар солиш лозим. 2006 йилда туғилган кичик Ян Абиджандаги «AFI Sud Comoé» академисида кўзга ташланди. У ерда Деҳ Бамба президент эди. Футболчининг кескин ўсиши 2022 йилда Ганада ўтказилган U-17 турниридан сўнг бошланди. У ерда 5 та гол урган Ян Африкадаги барча скаутлар эътиборини тортди. Россиянинг «Виста» академияси унга жиддий қизиқиш билдирди, аммо Бамба (иккинчи ота ролини ўйнаган) бу вариантни блоклади. Аммо Ҳьюстонда жойлашган ва минтақада мустаҳкам ўринга эга «Blue Crow» инвестиция гуруҳи уларни кўндира олди.
Диоманденинг биринчи манзили «Blue Crow»нинг Дубайдаги академияси бўлди. У ердан иқтидорини ҳисобга олиб, уни Флоридадаги «DME Academy»га юборишди. У ерда спортчиларни элитага тайёрлашарди ва у «Blue Crow» билан шартномаси бўлган «Rainbow» компанияси томонидан бошқарилар эди.
АҚШда «Dio» номини олган футболчи «Yulee Hornets» ва «Frenzi» жамоаларида порлади. Шундан сўнг грандлар — «Борнмут», «Рейнджерс», «Кристал Пэлас», «Челси» унга қизиқиб қолди. Айримлари ҳали жиддий клубда ўйнамаган болакай учун 8-9 миллион евро тўлашга тайёр эди. Аммо музокаралар амалга ошмади.
2023 йилда виза муддати тугаб, Диоманде Кот-д'Ивуарга қайтади ва 2024 йил июлидагина янги Шенген визасини олади. Бу орада «Blue Crow» билан тўловлар бўйича муаммога дуч келган «Rainbow» компанияси «Blue Crow»га билдирмасдан футболчига бошқа агент бириктиради. Бамба кўмагида ва Диоманденинг номидан «бўш қоғозга» қўл қўндириб, уни Грециянинг «Олимпиакос» клубига ўтказишга уринишади.
«Леганес»га ўтиш — бурилиш нуқтаси
«Blue Crow» тезкорлик билан Афинага Дубай академияси масъули бўлган жазоирлик агентни юборади. У футболчига агар у билан кетса, «Blue Crow»га тегишли «Леганес» билан дастлабки шартнома имзолаши мумкинлигини айтади. Диоманде рози бўлади ва Дубайдаги мавсумолди йиғинига йўл олади. У ердаги ўртоқлик ўйинида германиялик таниқли мураббий: "У аллақачон Чемпионлар Лигасида ўйнашга тайёр", деб баҳо беради. У ўшанда 17 ёшда эди.
18 ёшга тўлишига бир ҳафта қолганда Диоманде опасининг касалхонада оғир аҳволда ётгани ҳақида хабар олади ва Абиджанга учиб кетади. Опаси вафот этган ушбу оғир кунларда Бамба футболчига агар «Леганес» пул тўламаса, у ерга қайтмаслигини айтади. Диоманде қарийб икки йил ўйин амалиётисиз қолган эди. Бу сафар у Бамбанинг гапига кирмай, 18 ёшга тўлгач, ўз қарорини ўзи қабул қилади ва Испанияга йўл олади.
2024 йил ноябрида «Леганес»нинг ёшлар жамоасига қўшилган Ян зудлик билан асосий жамоагача кўтарилади ва 2025 йил 29 мартда «Реал Мадрид»га қарши Ла Лигада дебют қилади ҳамда Килиан Мбаппе билан либос алмашади.
Европадаги портлаш
Мавсум якунида «Blue Crow»га 41 та клубдан қўнғироқ бўлади. «Леганес» Сегундага тушиб кетгач, футболчи у ерда қола олмасди. Энг жиддий музокаралар «Монако» билан кечади, аммо французлар 20 миллионлик товон пулини тўлашдан бош тортишади.
Диоманде таътилга уйига қайтганида, Бамба уни «Maxidel» агентлиги эгаси Макс Градель билан таништиради. У футболчини «РБ Лейпциг»га таклиф қилади. Немислар товон пулини тўлашга рози бўлишади.
Германияда Диоманде Бундеслиганинг энг яхши ёш футболчиси деб топилди. Аммо унинг агентлик ҳуқуқлари янада чигаллашди. Градель футболчи шартномани узайтирганини айтди, Бамба эса буни инкор этиб видео жойлади. Якунда эса Винисиуснинг қўнғироғи ва «Roc Nation» эгаларининг таклифидан сўнг Диоманде АҚШ компанияси («Roc Nation») билан шартнома тузди.
Оқибатда портлаш юз берди: «Maxidel» трансфер ҳуқуқи уларда эканини айтиб «Roc Nation»ни судга берди. «Rainbow» эса имиж ҳуқуқлари учун ҳар икки агентликни ва «Blue Crow»ни айбламоқда. Бамбанинг эса «Blue Crow» билан алоҳида судлашуви бор.
«Реал» кутиш позициясида
Шундай мураккаб вазиятда саҳнага «Реал» чиқди. Футболчиларнинг имиж ҳуқуқларининг 50 фоизига эгалик қиладиган Мадрид клуби бу ҳуқуқий масалалар тўлиқ ҳал бўлишини талаб қилмоқда.
Бу муаммо ФИФА трансфер рухсатномасидан ҳам жиддийроқ бўлиши мумкин. Чунки ФИФА агентлар ўртасидаги комиссия низоларига аралашмайди ва клублар келишса, вақтинчалик трансферга рухсат беради. Аммо имиж ва собиқ шартномалар бўйича судлашувлар «Реал»ни хавотирга солмоқда.
Ҳозирда Диоманде «Лейпциг»нинг мавсумолди машғулотларидан четда, трансфернинг ижобий ҳал бўлишини кутмоқда.
