Белгия миллий жамоасининг ҳужумкор яримҳимоячиси «Милан» сафида ўтган даврни ёдга олди.
«Милан» чемпионлик мавсумидан кейин Шарл де Кетеларе билан шартнома имзолади, аммо белгиялик футболчи Италия клубида кутилган даражани, ўз ўйинини топа олмади. Куни кеча де Кетеларе Nieuwsblad'га интервюсида «Милан»га ўтганидан афсусланмаслигини маълум қилди.
«Мен ҳали ҳам «Брюгге»дан «Милан»га ўтганимдан афсусланмайман. Эҳтимол, ўша пайтда ўзимга кўпроқ ишонишим керак бўлгандир, лекин вақт ўтиши билан мен бунга ҳам ўргандим. Гасперинининг «Аталанта»даги ўйин услуби ривожланишимга, ўсишимга ёрдам берди. Ўйлашимча, 3-4-3 ёки 3-5-2 тактик схемаларида менинг ҳислатларим ҳаммасидан ҳам яққолроқ намоён бўлади», - деди де Кетеларе.
Маълумот учун, Шарл де Кетеларе ҳозирда «Аталанта» шарафини ҳимоя қилади. 2024 йил ёзида «Аталанта» футболчини «Милан»дан 23,70 млн евро эвазига тўлиқ сотиб олди.
Ушбу мавсум Бергамо клуби сафида яримҳимоячи барча мусобақаларни инобатга олсак, 33 ўйинда майдонга тушиб, 5 та гол урди ва 5 та голли узатма етказиб берди.
Transfermarkt портали 25 ёшли белгияликнинг актуал трансфер нархини 35 млн еврога баҳоламоқда.
