Златко Далич Хорватия миллий жамоаси бош мураббийи лавозимини тарк этади. Бу ҳақда Jutarnji List нашри хабар берди.
59 ёшли мутахассиснинг Хорватия футбол иттифоқи (HNS) билан шартномаси якунига етди. Маълум қилинишича, Далич 2026 йилги жаҳон чемпионати бошланишидан олдин Бирлашган Араб Амирликлари клубидан бир мавсум учун 5 миллион евро миқдоридаги таклифни қабул қилган. У келаси ҳафта миллий жамоадан кетишини расман эълон қилиши кутилмоқда.
Хорватия футбол иттифоқи Даличнинг ўрнига асосий номзод сифатида Славен Билич вариантини кўриб чиқмоқда. У 2006–2012 йиллар оралиғида ҳам миллий жамоани бошқарган, шундан сўнг «Локомотив» клубига ўтиб, у ерда бир мавсум ишлаган.
Маълум қилинишича, Хорватиянинг 2026 йилги жаҳон чемпионати 1/16 финал босқичида Португалияга 1:2 ҳисобида мағлуб бўлганидан кейин мамлакат футбол иттифоқи раҳбарияти ичида Билич номзоди муҳокама қилинган. Таъкидланишича, мутахассис миллий жамоага қайтишга тайёр.
Маълумот ўрнида, Далич 2017 йилдан буён Хорватия миллий жамоасини бошқариб келаётганди. Унинг қўл остида жамоа 2018 йилги жаҳон чемпионатида кумуш, 2022 йилги жаҳон чемпионатида эса бронза медалларини қўлга киритган.
