«Атлетико» Бернардуга «Барса»дан кўра икки баравар кўпроқ маош таклиф қилмоқда

«Атлетико» Бернарду Силвага «Барселона»дан кўра икки баравар кўпроқ маош таклиф қилди, деб хабар бермоқда El Chiringuito.

Бундан ташқари, мадридликлар каталонияликлардан фарқли ўлароқ, «Манчестер Сити» собиқ яримҳимоячисига асосий таркибдан жой кафолатлашмоқда.

AS нашрининг маълум қилишича, португалиялик футболчи сўнгги вақтларда «Барселона»дан анча узоқлашган. Ҳолбуки, ўтган ҳафтагача келишув деярли якунланган деб ҳисобланаётган, футболчи икки йиллик шартнома имзолаши кутилганди.

Каталония клуби Бернардунинг трансфери учун «кимошди савдоси»га киришиш ниятида эмаслигини билдирган. Клуб икки йиллик шартнома таклифини берган ва бу таклиф қабул қилинади, деб ҳисоблаган.

31 ёшли Силва ўтган мавсумда АПЛда 38 та ўйин ўтказиб, 2 та гол ва 4 та ассистни ўз ҳисобига ёздириб қўйган.