Дунёнинг учинчи ракеткаси Карлос Алкарас Париждаги «Мастерс» турнири финалида Бен Шелтонни мағлуб этди.
Натижада испаниялик теннисчи ATP турнирларидаги 29-титулини, ушбу мавсумдаги бешинчи ва «Мастерс» турнирларидаги тўққизинчи совринини қўлга киритди.
Энди Карлоснинг ҳисобида ATP 1000 туркумидаги тўққизта турнирдан еттитасида қўлга киритилган чемпионлик титуллари бор. У фақат Канада ва Шанҳайдаги мусобақаларда ғолиб бўлмаган.
Бундан ташқари, Алкарас теннис тарихида кетма-кет беш мавсумда ATP 1000 туркумидаги турнирларда чемпион бўлган учинчи теннисчига айланди. Аввалроқ Новак Жокович (2011–2016, 2018–2023) ва Рафаэл Надал (2005–2014) шундай натижага эришган.
Шунингдек, 23 ёшли теннисчи ғалабали сериясини 10 та ўйинга етказди. У ўтган ҳафта Венадаги турнирда ҳам чемпионликни қўлга киритганди.
Энди Алкараснинг Бен Шелтонга қарши ўзаро учрашувлардаги устунлиги 4:1 ни ташкил этмоқда. Америкалик теннисчи ягона ғалабасини 2026 йилги US Open турнирининг чоракфиналида қўлга киритган.
Rolex Paris Masters
Париж, Франция
2-8 ноябр, 2026
ATP Masters 1000
Мукофот жамғармаси – 6 309 095 евро
Ёпиқ кортлар, ҳард
Финал
Карлос Алкарас (Испания) — Бен Шелтон (АҚШ) 7:6, 7:5
Алкарас — Париж ATP ғолиби
Теннис
9 ноябр, 04:45
Испаниялик теннисчи финалда америкалик Бен Шелтонни мағлуб этди.
Foto: Getty Images
