European Football Clubs (EFC) ташкилоти раҳбари Носир Ал Хилайфий жаҳон футбол клубларининг манфаатларини ифода этувчи янги ассоциация тузиш зарурлигини маълум қилди. У бу ҳақда ташкилотнинг умумий йиғилишида гапирди.
Ал Хилайфийнинг сўзларига кўра, футбол клублари бугун аввалгидан кўра анча глобал мақомга эга. Шу билан бирга, улар ўз маҳаллий жамоалари билан алоқаларини сақлаб қолмоқда. European Football Clubs (EFC) раҳбари клубларнинг дунё миқёсидаги таъсири кучайгани сабабли уларнинг манфаатларини янада кенгроқ ҳимоя қилиш кераклигини таъкидлади.
«Бугун клубларимиз ҳар қачонгидан ҳам глобал ва халқаро мақомга эга. Шу билан бирга, улар ўз маҳаллий жамоаларининг бир қисми бўлиб қолмоқда. Футболчилар, мураббийлар, мусобақалар, мухлислар, клуб эгалари ва ҳамкорларнинг барчаси маҳаллий илдизларга эга, аммо глобал таъсир кўрсатмоқда», — деди Ал Хилайфий.
Унинг фикрича, айнан шу сабабли World football clubs номли ташкилотни тузиш вақти келган. Ал Хилайфий янги ассоциация дунёнинг барча клубларига вакиллик ва ўз овозига эга бўлиш имконини бериши кераклигини айтди.
«Дунёдаги ҳар бир клуб вакилликка эга бўлиши, ўз овозини билдира олиши ва муваффақиятга эришиш учун яхшироқ имкониятга эга бўлиши керак», — деди European Football Clubs (EFC) раҳбари. Унинг сўзларини ташкилотнинг расмий сайти келтирди.
Ал Хилайфий клублар ўртасидаги ҳамкорлик муҳимлигини ҳам таъкидлади. У катта ва кичик клублар бир-бирига эҳтиёж сезишини, футбол ривожи учун барча манфаатдор томонлар биргаликда ҳаракат қилиши кераклигини қайд этди.
Журналист Бен Жейкобснинг ёзишича, йиғилишнинг айрим иштирокчилари World football clubs лойиҳасини норасмий «олтинчи конфедерация» сифатида баҳолаган. Уларнинг фикрича, бундай ташкилот ФИФА ва унинг президенти Жанни Инфантинонинг футболдаги ваколатларига қарши муқобил марказга айланиши мумкин.
Маълумот учун, EFC аввал Europen Clubs Assotsiation (ESА) номи билан фаолият юритган ва Европа футбол клублари манфаатларини ифода этувчи ташкилот ҳисобланади.
