Ten Hag: «Ronaldu 7–8 yildan beri avvalgi darajasida emas. «Real» u bilan vaqtida xayrlashgan»

Erik ten Hag Krishtianu Ronaldu anchadan buyon avvalgi darajada o‘ynash qobiliyatini yo‘qotgan deb hisoblaydi.

«Manchester Yunayted»ning sobiq bosh murabbiyi Angliya klubida birga ishlagan paytlarida u bilan o‘zaro kelishmovchilikka borgan 41 yoshli futbolchi haqida o‘z fikrlarini bildirdi.

«Keling, bir narsaga oydinlik kiritib olaylik: men uchun Krishtianu, shubhasiz, fantastik futbolchi va barcha davrlarning eng buyuk o‘yinchilaridan biri. Ammo haqiqat shundaki, so‘nggi 7–8 yil davomida u avvalgi darajasida o‘ynay olmadi. «Yuventus»dagi davridan keyin uning faoliyatidagi bu bosqich amalda yakunlandi.

Aslida, «Real»ning eng kuchli jihati shundaki, klub futbolchi bilan xayrlashish uchun eng maqbul vaqtni doimo to‘g‘ri belgilaydi. Ular futbolchining saviyasi qachon pasaya boshlaganini yaxshi tushunishadi va hamkorlikni shunday paytda yakunlashga qaror qilishadiki, tashqi tomondan hali ham futbolchi o‘zining eng yuqori cho‘qqisida turganday ko‘rinadi. Vaholanki, u allaqachon zarur talablarga javob bera olmay qolgan bo‘ladi.

Eng muhimi, ular buni vaziyat og‘riqli tus olishidan oldin amalga oshirishadi», — dedi niderlandiyalik mutaxassis ESPN telekanalidagi Goedemorgen Eredivisie dasturida.