O'zbekiston delegatsiyasi XX yozgi Osiyo o'yinlaridagi ikkinchi medalini qo'lga kiritdi.
Aralash jang san'atining modern yo'nalishida -71 kg vazn toifasida ishtirok etgan Nodirbek Shavkatov musobaqani bronza medali bilan yakunladi.
Hamyurtimiz musobaqa davomida muvaffaqiyatli ishtirok etib, yarimfinal bosqichiga qadar yetib bordi. Final yo'llanmasi uchun kechgan bellashuvda Shavkatov Qozog'iston vakili Qodirbek Shinbayevga qarshi bahs olib bordi. Murosasiz kechgan to'qnashuv yakunida qozog'istonlik sportchining qo'li baland keldi.
Shu tariqa, Nodirbek Shavkatov 2026 yilgi Osiyo o'yinlarida uchinchi o'rinni egallab, bronza medaliga sazovor bo'ldi.
Ushbu natija O'zbekiston delegatsiyasi uchun musobaqadagi ikkinchi medal bo'ldi. Hamyurtimiz aralash jang san'atlari bo'yicha mamlakatimiz hisobiga navbatdagi sovrinni qo'shib qo'ydi.
Avvalroq Humoyunmirzo Halimov Osiyo o'yinlarining kumush medalini qo'lga kiritgani ma'lum qilingandi.
Muxlislar bu yangilikni Telegram’da muhokama qilmoqda
Izohlar Telegram’da ochiladi