Dunyoning 12-raketkasi serbiyalik tennischi Novak Jokovich Shveysariyaning Bazel shahrida o‘tkazilayotgan ATP-500 turnirining ikkinchi bosqichiga yo‘l oldi. Ochilish bahsida u jahon reytingida 38-o‘rinni egallab turgan fransiyalik Ugo Umberni mag‘lub etdi. Uchrashuv 4:6, 6:3, 6:4 hisobida yakunlandi.
Tennischilar kortda 2 soat 29 daqiqa mobaynida bahs olib borishdi. Jokovich to‘qqiz marta eys amalga oshirib, uchta qo‘sh xatoga yo‘l qo‘ydi va sakkizta breyk-pointning ikkitasidan unumli foydalandi. Umber 12 ta eys amalga oshirdi, uchta qo‘sh xatoga yo‘l qo‘ydi va oltita breyk-pointning bittasidan unumli foydalandi.
Ma’lumot uchun, ikkinchi davrada Jokovich germaniyalik tennischi Yan-Lennard Shtruffga qarshi kortga chiqadi.
Eslatib o‘tamiz, Bazeldagi turnir 26-oktyabrdan-1-noyabrgacha davom etadi. Amaldagi chempion braziliyalik tennischi Joau Fonseka hisoblanadi.
