Afrika futbol konfederatsiyasi (CAF) prezidenti Patrik Motsepe FIFA prezidenti Janni Infantinoga bildirilayotgan tanqidlarga munosabat bildirdi.
Avvalroq FIFA Jahon chempionati huquqlarini xususiy investorlarga sotish uchun FIFA Forward Enterprise (FFE) nomli yangi tijoriy tuzilma tashkil etishni rejalashtirgani xabar qilingandi. Keyinchalik konfederatsiyalar tanqidi va UEFAga a’zo mamlakatlarning Jahon chempionatini boykot qilish ehtimoli ortidan Infantino bu rejadan voz kechgan.
Shundan so‘ng ayrim futbol assotsiatsiyalari 2027 yil mart oyida bo‘lib o‘tadigan FIFA prezidentligi saylovida Infantinoni qo‘llab-quvvatlamaslikka qaror qilgani ma’lum bo‘ldi.
«Agar kimdadir Janniga yoki boshqa biror kishiga nisbatan e’tirozlar bo‘lsa, jarayonni kuzating va FIFA tartib-qoidalariga amal qiling. Hammasi oddiy. Agar uni lavozimidan chetlatmoqchi bo‘lsangiz, saylovga boring va 211 ta assotsiatsiya qaror qabul qilsin. Shuni amalga oshiring, ovoz berish orqali unga ishonch bormi yoki yo‘qligi ko‘rinadi», — dedi Motsepe.
CAF rahbari barcha tomonlar adolatli jarayondan foydalanish huquqiga ega ekanini ta’kidladi.
«Har bir insonning o‘z fikrini bildirish huquqi bor. Keling, tinglov va tegishli forum, tergov, sud yoki tribunal o‘tkazaylik. Har bir inson adolatli munosabatga haqli. Muammolar va tuzatilishi kerak bo‘lgan salbiy jihatlar ko‘p. Ammo u uzr so‘radi va ayrim ishlarni boshqacha qilish kerak bo‘lganini aytdi», — dedi u.
Motsepe FIFA prezidenti saylovida kim g‘olib bo‘lishidan qat’i nazar, tashkilot rahbarini qo‘llab-quvvatlashini bildirdi.
«Ko‘pincha men g‘alaba qozonishini istagan nomzodlar yutmaydi. Kim g‘alaba qozonishidan qat’i nazar, men uni qo‘llab-quvvatlashim kerak. Men butun dunyodagi assotsiatsiyalardan ko‘plab qo‘ng‘iroqlar olaman. Birlik va hamkorlikka urg‘u berishni yoqtiraman», — deya qo‘shimcha qildi CAF prezidenti.
Eslatib o‘tamiz, FIFA prezidentligi uchun navbatdagi saylov 2027 yil mart oyida bo‘lib o‘tishi rejalashtirilgan.
