«Ювентус» футболчиси Кенан Йилдиз Европанинг гранд клублари эътибор марказида қолмоқда.
Туркиялик вингер шу йилнинг феврал ойида «Ювентус» билан шартномасини 2030 йилгача узайтирганди. Шунга қарамай, унинг эҳтимолий трансфери ҳақидаги гап-сўзлар тинмаяпти.
Журналист Экрем Конурнинг хабар беришича, «Бавария», «Арсенал» ва «Реал» Йилдизни трансфер мақсадларидан бири сифатида белгилаган. Учала клуб ҳам 2027 йил ёзида футболчи бўйича музокаралар ўтказишни режалаштирмоқда.
«Ювентус» эса 21 ёшли футболчини сотишни режалаштирмаяпти. Бунгача «зебралар» Кенанни 100 миллион еврога баҳолаётгани ҳақида хабар берилганди.
Маълумот ўрнида, Йилдиз «Ювентус» сафида 132 та учрашувда майдонга тушиб, 27 гол урган ва 21 ассист амалга оширган. Унинг Transfermarkt порталидаги трансфер нархи 75 миллион еврони ташкил қилади.
