«Трансфер бир кунда ҳал бўлиб қолгани йўқ, мундиал ҳар қандай футболчини ўзгартиради» — Абдулла Абдуллаев

«Навбаҳор» клуби ёзги трансферларини амалга оширмоқда ва улар бу борада анча сифатли харидларни рўёбга чиқаришяпти.

Жумладан, Ўзбекистон миллий жамоаси сафида жаҳон чемпионатида қатнашиб, катта тажрибага эга бўлган таняч ҳимоячиси Абдулла Абдуллаев яқинда расман наманганликлар аъзосига айланганидан хабарингиз бўлса керак.

Абдуллаев бунгача БАА чемпионатида фаолиятини олиб борганди. У ердаги бир йиллик ҳаётидан кейин футболчимиз яна юртимизга қайтишга қарор қилди.

Tribuna.uz журналисти эса Абдуллаев билан боғланди ва табиийки, янги клубга ўтиши, мундиалдаги таассуротлар борасида суҳбатлашди.

- Абдулла, аввало сизни «Навбаҳор» клубига ўтганингиз билан табриклайман. Бу қандай содир бўлди? Таклиф олдиндан бормиди ёки барчаси тезлашиб кетдими?

- Ростини айтсам, бу трансфер бир кунда ҳал бўлиб қолгани йўқ. Клуб томонидан қизиқиш аввалроқ пайдо бўлган эди. Жаҳон чемпионатидан кейин вазият янада тезлашди, чунки кўплаб клублар футболчиларни кузатиб боришди. «Навбаҳор» раҳбариятининг аниқ режаси, жамоанинг мақсадлари ва менга билдирилган ишонч қарор қабул қилишимда ҳал қилувчи омил бўлди. Шунинг учун бу трансферда ҳам олдиндан бўлган қизиқиш, ҳам кейинги тезлашган музокаралар муҳим роль ўйнади.

- БАА чемпионатида ўтказган фаолиятингиз нимаси билан ёдингизда қоладиган бўлди?

- БААдаги фаолиятим мен учун катта мактаб бўлди. У ерда футболнинг тезлиги, тактик интизом ва профессионал муҳит бошқача даражада. Турли мамлакатлардан келган кучли футболчилар билан бирга ўйнадим, бу эса ўз устимда ишлашимга катта туртки берди. Энг асосийси, легионер сифатида янги муҳитга мослашиш, босим остида ўйнаш ва доимий рақобатда бўлиш менга катта тажриба берди. Шу жиҳатлари билан БААдаги даврим ёдимда қолади.

- Абдулла, жаҳон чемпионатидан кейин ўзингизда қандай ўзгаришларни ҳис қиляпсиз?

- Жаҳон чемпионати ҳар қандай футболчини ўзгартиради. Мен ҳам ўзимда катта ишонч пайдо бўлганини ҳис қиляпман. Шу билан бирга, масъулият ҳам ортди. Чунки мундиалда иштирок этган футболчи сифатида мухлислар ва мутахассислардан кутилмалар юқори бўлади. Бу эса мени янада кўпроқ меҳнат қилишга ундайди.

- Финалда Испания билан Аргентина куч синашадиган бўлди. Қанақа натижа кутяпсиз ва нима учун?

- Аргентина ютса керак, жамоадаги хамжиҳатлик жуда юқори даражада.

- Умуман олганда, мундиалда иштирок этиш бахтига муяссар бўлдингиз. У ерда тўп тепиш қандай экан?

- Буни сўз билан тўлиқ ифодалаш қийин. Жаҳон чемпионати футболнинг энг юқори саҳнаси. Майдонга чиқишингиз билан атмосферани ҳис қиласиз: стадион, мухлислар, матбуот эътибори ҳаммаси бошқача. Ҳар бир эпизодда рақибнинг даражаси юқори бўлади, хатолар кечирилмайди. Шу билан бирга, бу ҳар бир футболчининг орзуси. Мен учун бу катта шараф ва унутилмас тажриба бўлди.

- Ҳамма бу иштирокимизда гарчи барча ўйинларда ютқазган бўлсак-да, жамоамиз учун катта тажриба бўлгани ҳақида айтишяпти. Айтинг-чи, айнан қандай тажриба олдик, деб ҳисоблайсиз?

- Менимча, энг катта тажриба юқори даражада қарор қабул қилиш тезлигини ўрганиш бўлди. Мундиалда бир сония кечикиш ҳам натижага таъсир қилади. Биз жисмоний тайёргарлик, тактик интизом ва психологик барқарорлик бўйича кўп нарсани кўрдик. Шунингдек, катта мусобақада майдон ташқарисида ҳам ўзини тутиш, тикланиш жараёнлари ва профессионал ёндашув қанчалик муҳимлигини ҳис қилдик. Бу тажрибалар келажакда жамоамизга албатта фойда беради.

- Фабио Каннаваро ҳам табиийки, мусобақадан кейин танқид қилинди. Бунга жавобан сиз нима деган бўлардингиз?

- Футболда натижа бўлмаса, танқид бўлиши табиий. Лекин менимча, барча масъулиятни фақат мураббийга юклаш тўғри эмас. Каннаваро жамоа учун кўп меҳнат қилди, тайёргарлик жараёнида бизга ўз тажрибасини беришга ҳаракат қилди. Майдонда эса натижа учун футболчилар ҳам бирдек жавобгар. Биз ҳам айрим вазиятларда яхшироқ ўйнашимиз мумкин эди. Шунинг учун буни умумий тажриба ва келажак учун сабоқ сифатида қабул қилиш керак, деб ўйлайман.