«Трабзонспор» ҳужумчиси Муҳаммад Салоҳ шахматга бўлган иштиёқи ҳақида гапирди. 61sаат нашри хабарига кўра, мисрлик футболчи бўш вақтининг салмоқли қисмини ушбу ўйинга бағишлайди ва Туркиядаги онлайн платформада шахмат ўйнайди. Унинг рейтинги 1400 баллни ташкил этади.
«Шахматга бўлган қизиқишим ақлдан озиш даражасига етди. Деярли ҳар куни ўйнайман ва бу ўйинни жуда яхши кўраман», — деди футболчи.
Салоҳ ўтган ёзда эркин агент сифатида «Трабзонспор»га қўшилган. У жамоа сафида ўтказган 10 та баҳсида саккизта гол уриб, тўртта голли узатмани амалга оширди. Бу натижалар уни жамоанинг асосий футболчиларидан бирига айлантирган.
Маълумот учун, «Трабзонспор» Туркия чемпионати турнир жадвалида 13 очко билан бешинчи ўринда бормоқда. Жамоа тўртинчи поғонадаги «Бешиктош»дан икки очко ортда қолган. «Галатасарой» эса 19 очко билан пешқадамлик қилмоқда.
Эслатиб ўтамиз, «Трабзонспор» 19 октябр куни «Бешиктош»га қарши майдонга тушади. Ушбу баҳс жамоаларнинг турнир жадвалидаги ўрни учун муҳим аҳамият касб этади.
