Руминия чемпионатида янги жазо тури бўлган қора карточка ўйлаб топилди. Ҳозирча у 7 ёшдан 16 ёшгача бўлган футболчилар ўртасидаги мусобақаларда синовдан ўтказилади.
Қизиғи, қора карточка футболчилар учун эмас, балки уларнинг ота-оналари учун мўлжалланган. Руминияда фарзандларининг ўйинини томоша қилиш учун келган ота-оналарнинг майдон яқинида жанжал кўтариши ҳолатлари тез-тез учраб туради. Баъзида улар ҳатто майдонга чиқиб, ҳакамга «қандай ишлаш кераклигини» кўрсатишга ҳам уринади.
Ана шундай ҳолатларга қарши курашиш мақсадида қора карточка жорий этилди. У ҳакамларга ўзини ҳаддан ташқари фаол ва номақбул тутаётган ота-оналарга нисбатан чора кўриш имконини беради.
Аввалроқ FIFA «Венгер офсайди» синовларини бошлаши маълум қилинганди.
